ހައުސިން ޑީވެލޮޕްމަންޓު ކޯޕަރޭޝަން ލިމިޓެޑް (އެޗްޑީސީ)ގެ ނަމުގައި ފޭކު މެސެޖުތަކެއް ދައުރު ކުރާކަން ފާހަގަކޮށް، އެކަމަށް ސަމާލުވުމަށް އެ ކުންފުނިން އަންގައިފިއެވެ.
ޕޭމަންޓު ރިސީޕްޓްތަކަށް ރޭ ދިމާވި މި މައްސަލަ މިހާރު ހައްލުކުރެވިފައިވާކަން ފާހަގަކޮށް، އެޗްޑީސީގެ ބަޔާނުގައި ބުނެފައި ވަނީ، އެ ކުންފުނިން ކަސްޓަމަރުންނާއި ގުޅޭ ގޮތުން މީސްމީޑިއާގައި ދައުރުވަމުންދާ ޑޭޓާގެ މައްސަލަ ފުލުހުންނާއި ގުޅިގެން ތަހުގީގު ކުރަމުންދާ ކަމަށެވެ.
އެޗްޑީސީން ބުނީ ކަސްޓަމަރުންގެ މައުލޫމާތާއި ސެކިއުރިޓީއަކީ އެ ކޯޕަރޭޝަނުން ވަރަށް ބޮޑު އިސްކަމެއްދޭ ކަމެއް ކަމަށާއި، އެ ކޯޕަރޭޝަނުގެ ނަމުގައި ލިބޭ ފޭކު މެސެޖުތަކަށް ކަސްޓަމަރުން ކުރިޔަށް އޮތް ތަނުގައިވެސް ސަމާލުވުމަށް އެދޭ ކަމަށެވެ.
އަދި އޯޓީޕީ ފަދަ ސެކިއުރިޓީ ކޯޑުތައް އެއްވެސް ފަރާތަކާ ހިއްސާ ނުކުރުމަށް ވެސް އެޗްޑީސީން ވަނީ އިލްތިމާސްކޮށްފައެވެ.
