ވޯޓު ހޯދުމަށްޓަކައި ދީނީ ކާޑު ކުޅެނީ ކޮންބައެއްކަން ދިވެހި ރައްޔިތުންނަށް ވަރަށް ސާފު ކަމަށް ސަލަފު ޖަމުއިއްޔާގެ މެމްބަރު އަލީ ރަމީޒު ވިދާޅުވެއްޖެއެވެ.

Ads by Asuru

އޭނާ މިހެން ވިދާޅުވީ އަދާލަތު ޕާޓީގެ އިލްމުވެރިންގެ މަޖިލީހުގެ ރައީސް، ޑރ.މުހައްމަދު އިޔާޒު ކުރެއްވި ޓްވީޓަކަށް ރައްދު ދެއްވައި ފޭސްބުކްގައި ކުރެއްވި ޕޯސްޓެއްގައެވެ.

އިޔާޒުގެ ޓްވީޓުގައި ވަނީ އިހްލާސްތެރިކަމެއް ނެތި، ވޯޓުކޮޅެއް ހޯދުމުގެ ބޭނުމުގައި ދީނީ ކާޑު ކުޅެން އުޅުނަސް، ފައިދާއެއް ނުކުރާނެ ކަމަށެވެ. އިޔާޒަށް ރައްދު ދެއްވައި އަލީ ރަމީޒު ވިދާޅުވީ އިހްލާސްތެރި ކަމެއް ނެތި، ދީނީ ކާޑު ކުޅެގެން، އޭގެ ހިތި ޒަހަރު ބޮމުންދަނީ ކޮންބައެއްކަންވެސް ރައްޔިތުންނަށް ވަރަށް ސާފު ކަމަށެވެ.

އަލީ ވަނީ އަދާލަތު ޕާޓީގެ ރައީސް، އަދި ހޯމް މިނިސްޓަރު އިމްރާން، ދީނީ އިލްމުވެރިޔާ ޑރ.އަފްރާޝީމް އަލީގެ މަރުގެ ތުހުމަތު، ކުރީގެ ރައީސް ޔާމީން އަބްދުލްގައްޔޫމްގެ އިސްތަށިފުޅުގައި އަޅުވައި، 2018 ވަނަ އަހަރުގެ ރިޔާސީ އިންތިހާބުގެ ކެމްޕެއިން ދުވަސްވަރު ދެއްކެވި ވާހަކަތަކަށްވެސް ވަރަށް ބޮޑަށް ފާޑުވިދާޅުވެފައެވެ.

”ހަމްދު ސަަލަވާތް ކިޔެވުމަށްފަހު، މިހިރީއޭ ކިތާބީ ހެކި ކިޔައި، ފޭކް ނޫސް ކަރުދާސްތަކެއް ދައްކައި، އެތައް ސަތޭކަ ބައެއްގެ ކުރިމަތީގައި ބުހުތާނު ދޮގު ހަދައި، މުސްލިމެއްގެ ބޮލުގައި މީހެއްގެ މަރުގެ އިލްޒާމް އަޅުވައިލީ، ތިމާމެން މަރުވާނެ ކަމަށްވެސް ގަބޫލު ނުކުރަނީތޯއެވެ؟“ އަލީގެ ޕޯސްޓުގައިވެއެވެ.

އޭނާ ވިދާޅުވީ މިފަދަ އެތައް ޖަރީމާއެއް ހިންގާފައިވަނީ ކޮންބައެއްކަންވެސް ދިވެހި ރައްޔިތުންނަށް ސާފު ކަަމަށެވެ.

ގިސޯސް ހިފުމަކީ ލާޒިމް ކަމެއް ނޫން ކަމަށް، ކުރީގެ ރައީސް މައުމޫން އަބްދުލްގައްޔޫމް ވިދާޅުވުމުން، އެކަމާ ދެކޮޅަށް ނުކުތް އަދާލަތު ޕާޓީގެ ޒައީމް، މިއަދު ސަރުކާރުގެ ސިޔާސަތަކީ ގިސޯސް ހިފުން ނޫން ކަމަށް ފާޅުގައި ސަރީހަ އިބާރާތުން ބުނުމުން، އިހްލާސްތެރިންނާ މުނާފިގުން ރައްޔިތުންނަށް ފިސާރި ރަނގަޅަށް ވަނީ ސާފުވެފައި ކަމަށްވެސް އަލީ ވިދާޅުވިއެވެ.

އަލީ އިތުރަށް ވިދާޅުވީ ލަދު ހަޔާތް ނެތުމުން، ކޮންމެ ފަދަ އެއްޗެއްވެސް ކިޔާނެ ކަމަށެވެ.