ސަރުކާރުގެ ސިޔާސަތުތަކާއި ސަރުކާރުން ހިންގާ ތަރައްގީގެ މަޝްރޫއުތަކާ ގުޅޭ ގޮތުން ރައްޔިތުންނަށް އޭގެ ފައިދާތައް އެންމެ ފުރިހަމައަށް ކުރާނީ އެ ރައްޔިތުންގެ ދާއިރާ ތަމްސީލުކުރާ މެމްބަރަކީ ސަރުކާރަށް އެއްބާރުލުން ދޭނެ މެމްބަރަކަށް ވަންޏާކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެއެވެ.
’ސަންގު ޓީވީ‘ އަށް ދެއްވި ހާއްސަ އިންޓަވިއުއެއްގައި ރައީސް ވިދާޅުވީ ސަރުކާރަށް ތާއީދުކުރާ މެމްބަރުން މަޖިލީހުގައި ގިނައިން ތިބުމަކީ ރައްޔިތުންނަށް އޭގެ ފައިދާވާނެ ކަމެއްކަން، އެމަނިކުފާނުގެ ވެރިކަމަށް މިވީ ހަތަރު މަސްދުވަހުގެ ތެރޭގައި ވެސް ހާމަވެގެން ހިނގައްޖެކަމަށެވެ.
ރައީސް ވިދާޅުވީ ސަރުކާރުގެ މަސައްކަތްތައް ހުއްޓުވުމާއި އެ މަސައްކަތްތަކަށް ހުރަސް އެޅުމާއި، އެއްވެސް އަސާސެއް ނެތި އެމްޑީޕީގެ ސުޕަރ މެޖޯރިޓީ މިހާރު އޮތް މަޖިލީހުން ކުރަމުންދާ ކަންތައްތަކުގެ ގެއްލުން ރައްޔިތުންނަށް ކުރަމުން އަންނަ ކަމަށެވެ. އެހެންކަމުން ޕީޕީއެމް/ޕީއެންސީ ކޮންގްރެސް ކޯލިޝަނަށް މިފަހަރުގެ ރައްޔިތުންގެ މަޖިލީހުގެ މެޖޯރިޓީ ހޯދައިދިނުމަށް ރައްޔިތުން މަސައްކަތް ކުރާނެ ކަމަށް އުއްމީދު ކުރައްވާ ކަމަށް ރައީސް ވިދާޅުވިއެވެ.
ތިންބައިކުޅަ ދެބަޔަކީ އަޅުގަނޑު ހަމަ ބޭނުންވާ ޓާކެޓް. އެއީ އެންމެ ރަނގަޅު ގޮތަކަށްވެސް ވާނީ. ނަމަވެސް ރައްޔިތުން ނިންމާނީ ކޮންބައެއްތޯ ހޮވާނީ. އަޅުގަނޑު ގަބޫލުކުރާ ގޮތަކީ ކޮންމެ ދާއިރާއެއްގެވެސް ކުރަން ހުންނަ މަސައްކަތްތައް، އެ ދާއިރާއެއްގެ ރައްޔިތުންނަށް ސަރުކާރާއެކީގައި މަސައްކަތް ކޮށްދޭނެ ބޭފުޅަކު ހޮވުމަކީ ރައްޔިތުންނަށްވެސް ވަރަށް ފަސޭހަ ވާނެ ކަމަކަށް ވާނެ ކަމަށް.
ރައީސް ވިދާޅުވީ ސަރުކާރަށް އެއްބާރުލުން ދޭނެ މެމްބަރަކާއެކީ މަސައްކަތް ކުރުމަށް ސަރުކާރަށްވެސް ވަރަށް ފަސޭހަ ވާނެ ކަމަށާއި، އެއްބާރުލުން ނުދޭ ނަމަ އެކި ކަހަލަ އުނދަގޫތައް ކުރިމަތިކުރަމުން ދާނެ ކަމަށެވެ.
ރައީސް ވިދާޅުވީ މި ސަރުކާރުން ކުރަން ނިންމާފައިވާ ހުރިހާ މަސައްކަތެއް މެނިފެސްޓޯގައި ލިޔުއްވާފައިވާނެ ކަމަށާއި، ވައުދުތައް ފުއްދުމަށް މަސައްކަތް ކުރައްވަނީ އެ ފޮތުގެ ތެރެއިން ކަމަށެވެ. އަދި މަސައްކަތްތައް ކުރައްވަމުން އަންނަނީ ވަރަށް ބާރު ސްޕީޑްގައި ކަމަށާއި އެ މަސައްކަތްތައް ހާސިލުކުރުމަށްވެސް ގިނަ ކަންތައްތަކެއް ކުރަން ޖެހޭއިރު، ރައްޔިތުންނަށްވެސް ފައިދާވާނީ ސަރުކާރުގެ މަސައްކަތްތަކަށް އެއްބާރުލުން ދޭނެ މެމްބަރުން މަޖިލީހަށް އިންތިހާބުކޮށްގެން ކަމަށް ރައީސް ވިދާޅުވިއެވެ.
