ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ރިޔާސީ ވައުދާ އެއްގޮތަށް ބޭރުގެ މަނީ ޓްރާންސްފާ ޕްލެޓްފޯމްތަކާއި ޑިޖިޓަލް ވޮލެޓުން ފައިސާ ޓްރާންސްފަރ ކުރެވޭނެ ހިދުމަތް ބޭންކް އޮފް މޯލްޑިވްސް (ބީއެމްއެލް) އާ ގުޅިގެން މިއަދު ވަނީ ފަށާފައެވެ.
މި ހިދުމަތަކީ ރާއްޖޭގެ ޒުވާނުން ވަރަށް ބޮޑަށް އެދިއެދި ތިބި ހިދުމަތެކެވެ. ކުދި ވިޔަފާރިތަކާއި ފްރީލާންސްކޮށް މަސައްކަތް ކުރާ ގިނަ ޒުވާނުންތަކެއް މި ދިވެހި މުޖުތަމައުގައި އުޅޭ އިރު، އެ ފަރާތްތަކުގެ އެންމެ ބޮޑު ކަންބޮޑުވުމަކީ ބޭރަށް އެމީހުންގެ މާކެޓު ފުޅާކޮށް، ބޭނުންތާކު ހުރެގެން އަތްމަތި ތަނަވަން ކުރެވޭނެ ގޮތެއް ހޯދުމެވެ.
ސަރުކާރުން ސިލްސިލާކޮށް ކުރިއަށްގެންދާ ’ރައީސްގެ ޖަވާބު‘ ޕްރޮގްރާމްގައިވެސް ދެ ދުވަހެއްގެ މަތިން ދެ ޒުވާނަކު ވަނީ މިކަމާ ގުޅޭ ސުވާލުތައް ރައީސްއާ ކުރިމަތިކުރައްވާފައެވެ. ރައީސް އެ ސުވާލުތަކަށް ދެއްވި ޖަވާބުގައިވެސް ވިދާޅުވެފައިވަނީ އެ މަސައްކަތް ބާރު ސްޕީޑުގައި ކުރަމުން އަންނަ ކަމަށާއި މި ސަރުކާރަކީ ޒުވާނުންގެ ކުރިއެރުމަށް އެފަދަ ހިދުމަތްތައް ތައާރަފްކޮށްދޭނެ ސަރުކާރެއް ކަމަށެވެ.
ޔަގީނުންވެސް އެކަން މިއަދު މި ސަރުކާރުން ސާބިތުކޮށްދީފިއެވެ. މި މަސައްކަތް ފަށާފައިވާކަން ރައީސުލްޖުމްހޫރިއްޔާގެ އޮފީހުން ހާމަކޮށްފައިވަނީ މިއަހަރުގެ ޖަނަވަރީ މަހުއެވެ. އެއަށްފަހު އެންމެ ތިން މަސް ދުވަހުގެ ތެރޭގައި ފަސޭހަކަމާއެކު ޑިޖިޓަލް ވޮލެޓުން މުއާމަލާތް ކުރެވޭނެ ހިދުމަތް މި ސަރުކާރުން ފަހިކޮށްދީފިއެވެ.
ބީއެމްއެލް އިން ވަނީ އެ ބޭންކުން މީގެ ކުރިން ބްލޮކްކޮށްފައިވާ ބޭރުގެ ވިޔަފާރިވެރިން އަންބްލޮކްކޮށް، ކަސްޓަމަރުންނަށް ބޭންކުގެ ވިސާ ޑޮލަރު ކްރެޑިޓް ކާޑު ނުވަތަ މާސްޓާކާޑް ޕްރީޕެއިޑް ޑޮލަރު ޓްރެވަލް ކާޑު ބޭނުންކޮށްގެން މި ޕްލެޓްފޯމްތަކުން ފައިސާ ފޮނުވުމާއި ލިބޭނެ ގޮތް ހަމަޖައްސާފައެވެ.
މީގެ އިތުރުން މި މާޗަންޓުންނަށް ފައިސާ ފޮނުވުމަށް ކާޑުގެ ޕްރައިމަރީ އެކައުންޓުގެ ގޮތުގައި ޑޮލަރު އެކައުންޓް ހިމެނޭ ބީއެމްއެލް އިން ދޫކޮށްފައިވާ ޑެބިޓް ކާޑު ވެސް ކަސްޓަމަރުންނަށް ބޭނުން ކުރެވޭނެ ކަމަށް އެ ބޭންކުން ބުންޏެވެ.
މި ބަދަލާ ގުޅޭ ގޮތުން އިކޮނޮމިކް މިނިސްޓަރ މުހައްމަދު ސައީދް އެކްސްގައި ކުރެއްވި ޕޯސްޓެއްގައި ވިދާޅުވީ އޮންލައިން އިންޓަނޭޝަނަލް ސޭލްސް އަދި ޑިޖިޓަލް ޕްލެޓްފޯމްތަކުން ފްރީލާންސަރުންނާއި ކުދި ވިޔަފާރިތަކަށް ޑޮލަރުން ފައިސާ ހޯދުމުގައި ފަސޭހަ ކޮށްދިނީތީ ބީއެމްއެލް އަށް ވަރަށް ބޮޑަށް ޝުކުރު އަދާކުރާ ކަމަށާއި ރައީސް މުއިއްޒަށްވެސް މަރުހަބާ ދަންނަވާކަމަށެވެ.
އީވޮލެޓްގެ ހިދުމަތް މިއަދު ރާއްޖޭގައި ފަށާފައިވާއިރު، ޕޭޕަލް ހިމެނޭހެން ރާއްޖޭގައި އޮންލައިން ޕޭމަންޓް ސިސްޓަމްތައް ބޭނުންކުރެވޭ ގޮތް ހެދުމަކީ ރައީސް މުއިއްޒުގެ ރިޔާސީ ވައުދެކެވެ.
ރިޔާސީ ކެމްޕެއިން ތެރޭގައި އެމަނިކުފާނު ވިދާޅުވެފައިވަނީ ރާއްޖޭގައި ކްރިއޭޓިވް އިކޮނޮމީ ގާއިމްކުރުމުގެ ގޮތުން ސަރުކާރުން ގާއިމްކޮށް ތަންފީޒްކުރުމަށްޓަކައި އެންމެ މުހިންމު އެއް ކަމަކީ ރާއްޖޭގައި އޮންލައިން ޕޭމެންޓް ޕްލެޓްފޯމްތައް މެދުވެރިކޮށް ފައިސާ ލިބިގަތުމަށް ހުރި ހުރަސްތައް ނައްތާލުން ކަމަށެވެ.
