ރައްޔިތުންގެ އުއްމީދުތަކާ އެއްވަރަށް ނަތީޖާ ނެރުމަށްޓަކައި ސަރުކާރުގެ ކެންޑިޑޭޓުން ރައްޔިތުންގެ މަޖިލީހަށް ހޮވަން ޖެހޭކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެއެވެ.
ކިނބިދޫ ދާއިރާއަށް ސަރުކާރުގެ ފަރާތުން ވާދަކުރައްވާ ކެންޑިޑޭޓް އަލީ އަޝްރަގްގެ ކެމްޕެއިން ޖަލްސާގައި މިރޭ ވާހަކަދައްކަވަމުން ރައީސް ވިދާޅުވީ ސަރުކާރުގެ ކެންޑިޑޭޓުން މަޖިލީހަށް ހޮވައިފިނަމަ ތަރައްގީއަށް ވަރަށް ބޮޑު ތަފާތެއް އަންނާނެކަމަށެވެ.
ރައީސް ވިދާޅުވީ އެމަނިކުފާނުގެ އަމާޒަކީ ނަތީޖާ ނެރުން ކަމަށާއި ރިޔާސީ އިންތިހާބުގައިވެސް ވައުދުވެވަޑައިގެންފައިވާނީ ރިޒަލްޓް އޮރިއެންޓަޑް ގަވަރމަންޓެއް ހިންގުމަށް ކަމަށެވެ. ރައީސް ވިދާޅުވީ މީގެ ކުރިން ރައްޔިތުންނަށް ހިދުމަތް ކުރުމަށް އެކިއެކި މަގާމުތަކުގައި މަސައްކަތް ކުރެއްވި އިރުވެސް އަމާޒަކަށް ވެފައި އޮންނާނީ ނަތީޖާ ނެރުން ކަމަށެވެ.
ރައީސް ވިދާޅުވީ ރައްޔިތުން ބޭނުންވާ ތަރައްގީ ބާރު ސްޕީޑުގައި ހާސިލްވެގެންދާނީ ސަރުކާރަށް އެއްބާރުލުން ދޭނެ މެމްބަރުން މަޖިލީހުގައި ތިބެގެން ކަމަށެވެ.
ކޮންމެ ކަމެއްގައި ދެކޮޅު ހަދާ، ރައްޔިތުންނަށް ބޭނުންވާ ކަންކަން ނުކޮށްދީ އަމިއްލަ މަސްލަހަތު އިސްކުރާ ބޭފުޅުން މަޖިލީހުގައި ތިބެގެން މި ދެންނެވި ނަތީޖާއެއް މާ އަވަސްކޮށް އަދި ރައްޔިތުން އެދޭ ގޮތަކަށް ނުނެރެވޭނެ.
ރައީސް ވިދާޅުވީ ކިނބިދޫ ދާއިރާގެ ތަރައްގީއަށް ވަރަށް ގިނަ ކަންކަން ކުރުމަށް މި ސަރުކާރުން ރާވާފައިވާއިރު، އެ މަޝްރޫއުތައް ފުރިހަމައަށް ކުރިއަށްގެންދެވޭނީ މަޖިލީހުގެ ތެރެއިން ލިބެންވާ އެއްބާރުލުން ސަރުކާރަށް ލިބިގެން ކަމަށެވެ.
ރައީސް ވިދާޅުވީ ބިންހިއްކުމުގެ މަޝްރޫއަކީ ވެސް ކިނބިދޫގެ ތަރައްގީއަށް ވަރަށް މުހިންމު މަޝްރޫއެއްކަމަށާއި އެ މަޝްރޫއުގެ އަމަލީ މަސައްކަތް ވަރަށް އަވަހަށް ފެށިގެންދާނެ ކަމަށެވެ. އެއާއެކު ކޯޒްވޭގެ މަސައްކަތްވެސް ޕްލޭންކުރެވިފައިވާކަމަށް ރައީސް ވިދާޅުވިއެވެ.
ތަރައްގީ ހުރީ ރޭވިފައި. މަޝްރޫއުތައް ހުރީ އެލައިންކުރެވިފައި، ތަރުތީބުކުރެވިފައި. ބޭނުންވަނީ އެއްބާރުލުން. ރައްޔިތުންގެ އެއްބާރުލުން.
ރައީސް ވިދާޅުވީ ދާއިރާގެ ރަށްތަކުގައި ހިންގުމަށް އަދިވެސް ގިނަ މަޝްރޫއުތަކެއް އެބަހުރިކަމަށެވެ. އޭގެ ތެރޭގައި ކުރީ ސަރުކާރުން ފަށާފައި ހުއްޓާލާފައި ހުރި މަޝްރޫއުތައް އަލުން ފެށުންވެސް ހިމެނޭކަމަށް ރައީސް ވިދާޅުވިއެވެ.
ޢޭރުން މަޖިލިސް ހިނގާނީ ރައީސް އޮފީސް ތެރޭގައި