ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން ވަނީ، ރައީސް ޔާމީން އަބްދުލްގައްޔޫމަށް ސަރުކާރަކުން ދެވެން އޮތް އެންމެ ބޮޑު ލުއި ދެއްވާފައި ކަމަށް ހއ.ބާރަށު ދާއިރާއަށް ޕީއެންސީ/ޕީޕީއެމްގެ ޓިކެޓުގައި ވާދަ ކުރައްވަވާ، ހުޅުމާލޭގެ ކައުންސިލަރު އިބްރާހީމް ޝުޖާއު ވިދާޅުވެއްޖެއެވެ.
ޕީއެންސީ/ޕީޕީއެމްގެ ލީޑަރޝިޕުން ބޭއްވި ޕެނަލް ޑިސްކަޝަންއެއްގައި ޝުޖާއު ވިދާޅުވީ، މި ސަރުކާރު ގެނައީ، އެ ދެ ޕާޓީގެ ކޯލިޝަނުން ކުރި ބުރަ މަސައްކަތްތަކާއި، ރައީސް ޔާމީން ވެސް ކުރެއްވި މަސައްކަތްޕުޅުތަކުގެ ސަބަބުން ކަމަށާއި، އެމަނިކުފާނަށް ގެކޮޅުގައި ވެސް ހުންނެވެނީ އެކަމުގެ ނަތީޖާއެއްގެ ގޮތުން ކަމަށެވެ.
”އަޅުގަނޑު ގަބޫލެއް ނުކުރަން، ސަރުކާރުން އޭގެ ތެރެއަށް އަތް ބާނައިގެން ރައީސް ޔާމީނަށް އިންސާފު ނުލިބި ހުރި ކަމަކަށް. އަދި ރައީީސް ޑރ.މުއިއްޒެއް ފުރުސަތެއް ވެސް ނުދެއްވާނެ ރައީސް ޔާމީނަށް އަނިޔާވެރިވުމުގެ އެއްވެސް ކަމެއް ނިޒާމުގެ ތެރެއިން، ހިނގާކަށް (އެއީ) އަޅުގަނޑުމެން ޔަގީން ކުރާ ކަމެއް.“ ޝުޖާއު ވިދާޅުވިއެވެ.
ޝުޖާއު ވިދާޅުވީ، ރައީސް ޔާމީން ޖަލު ބަންދުގައި ހުންނެވިއިރު، އެމަނިކުފާނު އެންމެ ފުރަތަމަ ފަހަރަށް ގެއަށް ބަދަލު ކުރީ، ޕީއެންސީ/ޕީޕީއެމްގެ ލީޑަރޝިޕުން ކުރި ބުރަ މަސައްކަތާއިއެކުގައި، ލޯކަލް ކައުންސިލުތަކުގެ އިންތިހާބުގައި ބޮޑު މެޖޯރިޓީއެއް ހޯދުމުން ކަމަށެވެ.
”މިއީ އަޅުގަނޑުމެން އިހްލާސްތެރިކަމާއެކު ކުރި މަސައްކަތް، މިއަދު މި ވާހަކަ އެހެން ގޮތަކަށް ބަދަލު ކުރަން އުޅުނަސް، އަޅުގަނޑުމެން އިހްލާސްތެރިކަމާއިއެކު ކުރި މަސައްކަތް ރައްޔިތުން ގަބޫލު ކުރާނެ.“
ޝުޖާއު ވަނީ، ރައީީސް ޔާމީންގެ ލޯޔަރުންގެ ގޮތުގައި މަސައްކަތް ކުރައްވާ ޓީމަށް ވެސް ފާޑުވިދާޅުވެފައެވެ.
އެގޮތުން ”ޖަމީލުމެން އުޅުނީ، މައްސަލައިގެ ވާނުވާ އަޅުގަނޑުމެންނަށް ނާންގަން“ ކަމަށް އޭނާ ތުހުމަތު ކުރެއްވިއެވެ. އަދި މައްސަލަ އިސްތިއުނާފަށް ހުށަހަޅަން ދެ މަސް ދުވަސް ހޭދަ ކުރުވި ކަމަށް ވެސް ތުހުމަތު ކުރެއްވިއެވެ.
މާފުށި ޖަލުގައި 11 އަހަރުގެ ޖަލު ހުކުމެއް ތަންފީޒު ކުރައްވަމުން ދަނިކޮށް ރައީސް ޔާމީން ގެއަށް ބަދަލު ކުރީ، 2023 ވަނަ އަހަރު ބޭއްވި ރިޔާސީ އިންތިހާބު، ރައީސް މުއިއްޒު ކާމިޔާބު ކުރައްވައި، ރައީީސް ޔާމީން ގެއަށް ބަދަލުކޮށްދިނުމަށް އެދިވަޑައިގަތުމުންނެވެ.
ދިންލުޔެއްވިޔާދެއްވީރައީސްސާލިހު