ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ތަރައްގީގެ ތަސައްވުރު ހާސިލުކުރުމަށްޓަކައި ރައްޔިތުންގެ މަޖިލީހުގެ މެޖޯރިޓީ ސަރުކާރަށް ދޭންޖެހޭކަމަށް ސަރުކާރުގެ ތާއީދާއެކު މާފަންނު އުތުރު ދާއިރާއަށް ވާދަކުރައްވާ ކެންޑިޑޭޓް މުހައްމަދު ނާޒިމް ވިދާޅުވެއްޖެއެވެ.
އޭނާގެ ކެމްޕެއިން ޖަލްސާގައި ރޭ ވާހަކަދައްކަވަމުން ވިދާޅުވީ މިހާރު މަޖިލީހުގައި މޯލްޑިވްސް ޑިމޮކްރެޓިކް ޕާޓީ (އެމްޑީޕީ)ގެ މެޖޯރިޓީ އޮތް އިރު، އޭގެ ބޭނުން ނަހަމަގޮތުގައި ކޮށްގެން ސަރުކާރަށް ޖެއްސުންކުރުން ނޫންކަމެއް އެ ޕާޓީން ނުކުރާ ކަމަށެވެ. މިކަންކަމަކީ ރައްޔިތުން ވިސްނަންޖެހޭ ކަންކަންކަމަށާއި، ރައްޔިތުންނާއި ދިވެހި ގައުމަށްޓަކައި ރައީސް މުއިއްޒު އެކުލަވާލާފައިވާ ތަރައްގީ ހާސިލްކުރެވޭނީ އެމަނިކުފާނަށް މަޖިލީހުގެ މެޖޯރިޓީ ދީގެން ކަމަށް ނާޒިމް ވިދާޅުވިއެވެ.
ނާޒިމް ވިދާޅުވީ ރާއްޖެއާއި ގުޅުން އޮތް ގައުމުތަކަށް ސަފީރުން ފޮނުވުމުގައިވެސް އެމްޑީޕީން މަޖިލިސް ތެރެއިން އަންނަނީ މި ސަރުކާރަށް ޖެއްސުން ކުރަމުން ކަމަށެވެ. އެގޮތުން ސަފީރުންނަށް ރުހުން ހޯދުމަށް އެޖެންޑާކުރުމަށް ކިތަންމެ ފަހަރަކު އެދިފައިވާނެ ކަމަށާއި އެކަމަށްޓަކައި އެމްޑީޕީގެ ފަރާތުން ލިބެން ޖެހޭ އެއްވެސް އެއްބާރުލުމެއް ނުލިބުމުން މަސައްކަތް ކުރިއަށް ނުގޮސް އޮތް ކަމަށް ނާޒިމް ވިދާޅުވިއެވެ.
ނާޒިމް ވިދާޅުވީ މަޖިލިސް ތެރެއިން ކަންކަން ނުކޮށް ގައުމު ނުހިންގޭނެ ކަމަށެވެ. އަދި ކުރީ ސަރުކާރުގެ ސުޕަރ މެޖޯރިޓީ އޮތް މަޖިލީހުން ފާސްކޮށްގެން މި ސަރުކާރުގެ މަޝްރޫއުތައް ހިންގުމަށްޓަކައި ފާސްކޮށްފައި އޮތް ބަޖެޓަކީ ސަރުކާރު ހިންގުމަށް އެކަށީގެންވާ ބަޖެޓެއް ނޫންކަމަށް ނާޒިމް ވިދާޅުވިއެވެ. ނާޒިމް ވިދާޅުވީ ގައުމަށް ފުރިހަމަ ތަރައްގީ ގެނެވޭނީ ރައީސް މުއިއްޒު ބޭޏުންފުޅުވާ ގޮތަށް ބަޖެޓު ހަދައިގެން ކަމަށެވެ.
ނާޒިމް ވިދާޅުވީ ރައީސް މުއިއްޒު ރައްޔިތުންނަށްޓަކައި ވެވަޑައިގެންފައިވާ ވައުދުތައް ފުއްދުމުގައި މަސައްކަތް ކުރައްވާތަން ފެނިވަޑައިގަންނަވާ ކަމަށާއި މިއަށް ވުރެ އިތުބާރުކުރެވޭ ސަރުކާރެއް މިހާތަނަށް ފެނިވަޑައިގެންފައި ނުވާކަމަށެވެ. އަދި ރައްޔިތުން އެކައްޗެއް ކިޔައިގެން ރައީސް މުއިއްޒަށް މަޖިލީހުގެ މެޖޯރިޓީ ލިބޭނެގޮތަށް ވޯޓު ފޮށިތައް ފުރާލުމަށް ނާޒިމް އެދިވަޑައިގެންނެވިއެވެ.
މަޖިލީހުގެމެނޯރިޓީ ދޭންވާނީ ކޮންމެރައްޔިތަކު ސަލާންޖަހާންޖަހާނެ ނާށިގަނޑެއްހޯދައިފަ.