ރައްޔިތުންނަށް ހިދުމަތް ކުރުމުގައި އެ ރައްޔިތަކީ ކޮން ފިކުރެއްގެ މީހެއްތޯ މި ސަރުކާރުން ނުބަލާނެ ކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެއެވެ.
ސަރުކާރުގެ ފަރާތުން ގަލޮޅު އުދުރު ދާއިރާއަށް ވާދަކުރައްވާ ކެންޑިޑޭޓް އާމިނަތު މިޔާދާގެ ކެމްޕެއިން ޖަލްސާގައި ރޭ ވާހަކަދައްކަވަމުން ރައީސް ވިދާޅުވީ އެމަނިކުފާނު ކުރިމަތީގައި ހުރިހާ ރައްޔިތުންވެސް ހަމަހަމަވާނެ ކަމަށް އެމަނިކުފާނު ތަކުރާރުކޮށް ދަންނަވާ ކަމަށާއި ސަރުކާރަށް ވޭތުވެދިޔަ ދުވަސްތަކުގައި ކޮށްފައިވާ ހުރިހާ ކަމަކުންވެސް އެކަން ހާމަވެގެން ގޮސްފައިވާނެ ކަމަށެވެ.
ރައީސް ވިދާޅުވީ ފިތުރު އީދާއި ގުޅިގެން ރާއްޖޭގައި ކުލަގަދަކޮށް އީދު ފާހަގަކުރުމަށްޓަކައި މި ސަރުކާރުން އިފްތިތާހު ކުރި ”އީދު އަލި“ އަށް ބެލިނަމަވެސް އެކަން ހާމަވެފައިވާނެ ކަމަށެވެ. އެގޮތުން މާލެ ސިޓީއަށް އެކަނި ބެލުމެއް ނެތި، ވެރިކަން ކުރާ ރަށެއްގައި ނަމަ އެންމެ ކުޑަ ރަށްތަކުގައި އަދި ސިޓީތަކުގައި އީދުގެ ކުލަތައް ދިއްލާފައިވާކަން ރައީސް ވިދާޅުވިއެވެ.
ރައީސް ވިދާޅުވީ ތަފާތުކުރުމުގެ ސިޔާސަތު ނޯންނާނެ ކަމަށާއި އެމަނިކުފާނަށް މުހިންމީ ކޮންމެ ރައްޔިތަކަށްވެސް ހަމަހަމަކަމާއެކު ހިދުމަތް ކޮށްދިނުން ކަމަށެވެ.
އެއީ ކޮންމެ ޕާޓީއަކުން ވިޔަސް، ކޮންމެ ފިކުރެއްގެ މީހަކަށް ވިޔަސް ތަފާތެއް ނުކުރާނަން. ކޮންމެ ރައްޔިތަކީ އެއްވަރުގެ ބޭފުޅެއް.
ރައީސް ވިދާޅުވީ ކުރިއަށް އޮތް ރައްޔިތުންގެ މަޖިލީހަށް މެމްބަރުން އިންތިހާބު ކުރައްވާއިރުވެސް، އެ މެމްބަރުންނަކީ އެ ފިކުރުގައި ތިބި ބައެއްތޯ ޔަގީންކުރަން ޖެހޭ ކަމަށެވެ. އަދި ރައްޔިތުންނަށް ހަމަހަމަކަމާއެކު ހިދުމަތް ކޮށްދޭނީ ސަރުކާރުގެ ކެންޑިޑޭޓުން ކަމަށާއި، އިންސާފްވެރިކަމާއެކު ރައްޔިތުންނަށް ހިދުމަތް ކުރުމަށް ސަރުކާރުގެ މެމްބަރުން ހޮއްވަވައިދެއްވުމަށް ރައީސް ވަނީ އެދިވަޑައިގެންފައެވެ.
ނާހަމަ ތެދެއް