ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ މާލީ ސިޔާސަތުތަކަށް ކުރީގެ ރައީސް މުހައްމަދު ނަޝީދު ތައުރީފްކުރައްވައިފިއެވެ.
ނަޝީދުގެ ނުރަސްމީ އެކައުންޓުން އެކްސްގައި ކުރެއްވި ޕޯސްޓެއްގައި ވިދާޅުވީ ރައީސް މުއިއްޒު މާލީ ޒިންމާތައް އަދާކުރައްވާތަން ފެނުމުން އުފާކުރައްވާކަމަށެވެ.
ރައީސް ނަޝީދު މިހެން ވިދާޅުވީ، 50 މިލިއަނުން މަތީގެ މަޝްރޫއުތައް ފަށާނީ މި އަހަރުގެ މެދުތެރެއިންކަމަށްބުނެ ރައީސް މުއިއްޒުގެ މާލީ ސިޔާސަތު ހާމަކުރައްވާ އެމަނިކުފާނު ދެއްކެވި ވާހަކަފުޅެއް ރިޕޯޓުކޮށްފައިވާ ހަބަރަކަށް ކޮމެންޓް ކުރައްވައެވެ.
ރައީސް ވިދާޅުވީ މި ސަރުކާރު އައިއިރު މުޅި ރާއްޖޭގައި ހުއްޓިފައިހުރި ބައެއް މަޝްރޫއުތައް އަލުން ފަށައިގެން މިހާރު ކުރިޔަށްދާކަމަށާއި، 50 މިލިޔަނުން ފެށިގެން މަތީގެ ހަރަދުތައް ހިނގާ ބޮޑެތި މަޝްރޫއުތައް އެކި މަސްތަކަށް ބަހާލައިގެން ކުރިޔަށްގެންދާނެ ކަމަށެވެ. ރައީސް ވިދާޅުވީ އެފަދަ ބައެއް މަޝްރޫއުތައް ޖުލައި މަހާ ހިސާބުގައި ފެށޭނެކަމަށެވެ.
ރައީސް ވިދާޅުވީ އާމްދަނީ މެނޭޖުކޮށްގެން ބާކީ ފަހު ކުއާރޓަރަށް ދާއިރު ބަޖެޓުގައި ދެން ހުރި ގިނަ މަޝްރޫއުތަކެއް ފައްޓަވާނެ ކަމަށެވެ. ސަރުކާރުން މިފަދައިން މަޝްރޫއުތައް ކުރިއަށްގެންދަނީ ފައިސާ ޗާޕްނުކޮށް، އާމްދަނީ އިތުރުކޮށްގެން ބޭރުގެ ދަރަނިވެސް ދައްކަމުންކަން ފާހަގަކުރައްވާ ރައީސް ވިދާޅުވީ ފައިސާއަކީ ރައްޔިތުންގެ ފައިސާކަމަށާއި މަޝްރޫއުތައް ކުރިއަށްގެންދިއުމުގައި ސަރުކާރުން މި ސިޔާސަތު ގެންގުޅެނީ ވީހާވެސް ރަނގަޅަށް އިގްތިސާދު މެނޭޖުކުރެވޭތޯ ބަލަން ކަމަށެވެ.
