ފ. ފީއަލީގައި ހިއްކާ ބިމުން އިތުރު 15 ހެކްޓަރު ބިން ހިއްކަވާނެކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު ފ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ފ. ފީއައްޔަށް ވަޑައިގެން އެރަށުގެ ރައްޔިތުންނާއެކު މިއަދު ބޭއްވި ބައްދަލުކުރެއްވުމުގައި ވިދާޅުވީ ފީއަލީގެ ރައްޔިތުންނަށް ބޭނުންވާ ގިނަ ކަންތައްތަކެއް ހުރިއިރު، އޭގެ ތެރެއިން ރަށުގެ ބިން ބޮޑުކޮށް ގެދޮރުވެރިކަން ފަހިކޮށްދިނުމަކީ އެންމެ މުހިންމު އެއް ކަންތައް ކަމަށެވެ.
ރައީސް ވިދާޅުވީ ރިޔާސީ އިންތިހާބު ތެރޭގައި ވެސް އެމަނިކުފާނު ވެވަޑައިގެންނެވި ވައުދާ އެއްގޮތަށް ފީއަލީގެ ބިން ހިއްކުމުގެ މަޝްރޫއު ކުރިއަށްގެންދަވާނެ ކަމަށެވެ. އެގޮތުން މިހާރު ފަށާފައިވާ ބިންހިއްކުމުގެ މަޝްރޫއުގެ އިތުރަށް ބާކީ ފަޅު ތެރޭގައި އޮތް ޖާގައާއެކު 15 ހެކްޓަރުގެ ބިން ހިއްކަވާނެކަމަށް ރައީސް ވިދާޅުވިއެވެ.
އިރާދަކުރެއްވިއްޔާ ހަމަ އެ މަސައްކަތް ނިމޭ އިރުގައި ތޮށިޖެހުމާ އެއްކޮށް ނިމިގެންދާނެ. ނިމިގެންދާއިރުގައި ހިއްކެން އޮތް އެންމެ ބޮޑު މިނަކަށް، އެންމެ ބޮޑު މިނަކަށް ހިއްކާ 15 ހެކްޓަރު، އަދި އެއަށްވުރެ ބޮޑަށް ހިއްކެންޏާ އެބައިވެސް ހިމެނޭގޮތަށް ބިން ހިއްކުމުގެ މަސައްކަތް ނިންމަދޭނަން.
ރައީސް ވިދާޅުވީ ބިން ހިއްކުމުގެ މަޝްރޫއުގެ އިތުރުން އެމަނިކުފާނު ވެވަޑައިގެންފައިވާ ވައުދުތަކާ އެއްގޮތަށް އަދި ރައްޔިތުން ބޭނުންވާ ކަންތައްތަކަށް އިސްކަންދީގެން މަސައްކަތްތައް ކުރިއަށްގެންދަވާނެ ކަމަށެވެ. އެގޮތުން ބައެއް މަޝްރޫއުތައް މިހާރުވެސް ފެށިފައި ހުރި އިރު، ސިއްހީ ދާއިރާއާއި ތައުލީމީ ދާއިރާއަށް އިތުރު މަޝްރޫއުތައް ކުރިއަށްގެންދިއުމަށް ބޭނުންވާކަމަށް ރައީސް ވިދާޅުވިއެވެ.
ސިއްހީ ދާއިރާގެ ތެރެއިން ސިއްހީ މަރުކަޒުގެ ފެންވަރު ރަނގަޅު ކުރަން ޖެހޭ ކަމަށާއި، ތައުލީމީ ދާއިރާއަށް ބަލާއިރު ސްކޫލްގައި މަލްޓި ޕާޕޯސް ބޮޑު ހޯލެއް އެޅުމާއި ސްކޫލަށް ބޭނުންވާ އިތުރު ކަންތައްތަކުގެ އިތުރުން ކުޅިވަރާ ގުޅޭ ކޯޓުތައް އެޅުމުގެ މަސައްކަތްވެސް ކުރައްވާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ އެއިން ކޮންމެ ކަމެއްވެސް ކުރާނެ ކަމުގެ ފުރިހަމަ ޔަގީންކަން ރައްޔިތުންނަށް އަރުއްވާކަމަށެވެ. މިދިޔަ ސަރުކާރުގެ މަސައްކަތްތައް ހުރިގޮތުން ބައެއް ރަށްރަށުގެ މަޝްރޫއުތައް ހުއްޓިފައި ހުރިކަން ފާހަގަކުރައްވާ ރައީސް ވިދާޅުވީ ކޮންޓްރެކްޓަރުންނަށް ދޭންޖެހޭ ފައިސާ ދިނުމަށްފަހު ބައެއް މަޝްރޫއުތައް މިހާރުވެސް ފަށާފައިވާކަމަށެވެ. އަދި ފީއަލީގައި ވެސް ހަމަ އެގޮތަށް ކުރިއަށްގެންދަވާނެ ކަމަށް ރައީސް ވިދާޅުވިއެވެ.
