ރާއްޖޭގައި 19 އެއާޕޯޓެއްގެ މަސައްކަތް އެކި މަރުހަލާތަކުގައި ކުރިއަށްދާކަމަށް ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރުސީއެލް) ގެ މެނޭޖިންގ ޑިރެކްޓަރ އަހުމަދު މުބީން ވިދާޅުވެއްޖެއެވެ.
ރައީސުލްޖުމްހޫރިއްޔާ ފ. އަތޮޅަށް ކުރެއްވި ދަތުރުފުޅުގައި އެ އަތޮޅު ފީއައްޔަށް ވަޑައިގެން އެރަށުގެ ރައްޔިތުންނާއެކު ބޭއްވި ބައްދަލުކުރެއްވުމުގައި ވާހަކަދައްކަވަމުން މުބީން ވިދާޅުވީ އިގްތިސާދީ ގޮތުން މިހާރު ރާއްޖެ އޮތް ހާލަތުން އެހެން ހާލަތަކަށް ގެންދިއުމަށްޓަކައި ވަރަށް ގިނަގުނަ މަސައްކަތްތަކެއް އެބަހުރިކަމަށާއި އޭގެ ތެރެއިން އެއާޕޯޓުތަކުގެ މަޝްރޫއުތަކަކީ ރާއްޖޭގެ ރައްޔިތުންނަށް އޭގެ ނަފާ އެންމެ ބޮޑަށް ކުރާނެ މަޝްރޫއުތައް ކަމަށެވެ.
މުބީން ވިދާޅުވީ އާރުސީއެލްގެ ދަށުގައި ހުރި އެއާޕޯޓުތައް ހަރުދަނާކުރުމުގެ ތެރޭގައި، ވައިގެ މަގުން ރާއްޖޭގެ އެއް ރަށް އަނެއް ރަށާ ގުޅާލުމާއެކު ރާއްޖޭގެ ޓޫރިޒަމް ސެކްޓަރ ބަދަލުވެ، ރާއްޖެ އަންނަ ފަތުރުވެރިންގެ އަދަދު ދުވަހެއް ދުވަހަކަށް އިތުރުވަމުން އަންނަކަމަށެވެ. އަދި މިހާރު ކުރިއަށްދާ އެއާޕޯޓު މަޝްރޫއުތައް ނިމުމުގެ އާހިރު ނަތީޖާއަކަށްވާނީ މުޅި ރާއްޖޭގެ އެކި ކަންކޮޅުތަކަށް އޭގެ ނަފާ ރައްޔިތުންގެ ޖީބާއި ހަމައަށް ފޯރުން ކަމަށް މުބީން ވިދާޅުވިއެވެ.
19 އެއާޕޯޓެއްގެ މަސައްކަތް ކުރަމުން އަންނައިރު، ދައުރުގެ މިހާ ކުރީކޮޅުގައި މިފަދަ މަޝްރޫއުތަކުގެ މަސައްކަތް ކުރެވިގެން އަންނަނީ ރައްޔިތުން އެދޭ މިންވަރަށް ކަންތައްތައް ފަހިކޮށްދިނުމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ދެއްވާ ހާއްސަ އިސްކަމުގެ ސަބަބުން ކަމަށް މުބީން ވިދާޅުވިއެވެ.
މުބީން ވިދާޅުވީ ކައުންސިލްތައް ބާރުވެރިކުރުވުމުގެ މުހިންމު މަސައްކަތްތައްވެސް މި ސަރުކާރުން ކުރަމުން އަންނަ އިރު، މި މަސައްކަތްތަކަކީ ރައްޔިތުންގެ މަސްލަހަތު އިސްކުރައްވައިގެން އެ ފަރާތްތަކުގެ ދިރިއުޅުން ހަރުދަނާކުރުމަށް ރައީސް މުއިއްޒު ކުރައްވަމުން އަންނަ މަސައްކަތްތައް ކަމަށެވެ.
