ނިމިދިޔަ މޯލްޑިވްސް ޑިމޮކްރެޓިކް ޕާޓީ (އެމްޑީޕީ)ގެ 5 އަހަރުގެ ދައުރުގެ ތެރޭގައި އެ ޕާޓިން ވަނީ އިސްލާމީ ކަންތައްތަކަށް އިހުމާލުވެ، އިސްލާމް ދީނަށް ފުރައްސާރަކޮށްފައި ކަމަށް ޕީޕީއެމް/ޕީއެންސީގެ ރައްޔިތުންގެ މަޖިލީހުގެ އިންތިހާބަށް ކަނޑައެޅި ތަރުޖަމާނު ހީނާ ވަލީދު ވިދާޅުވެއްޖެއެވެ.
ޕީޕީއެމް/ޕީއެންސީން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ހީނާ ވިދާޅުވީ ވޭތުވެދިޔަ ސަރުކާރުން މަޖިލީހުގެ ތެރެއިން ކަންތައްތައް ކޮށްފައިހުރި ގޮތް ހަނދާން އާކޮށްލަން ޖެހޭކަމަށެވެ. އެގޮތުން 5 އަހަރުގެ ދައުރުގެ ތެރޭގައި ގާނޫނު އަސާސީ ބަދަލުކޮށްލުމުގެ މެޖޯރިޓީ އެބޭފުޅުންނަށް އޮވެގެން ކަންތައްތައް ކޮށްފައި އޮތީ އިސްލާމް ދީނާއި މުޅިން ހިލާފަށް ކަމަށް ހީނާ ވިދާޅުވިއެވެ.
އެމްޑީޕީއަށް ގާނޫނު އަސާސީ އަމިއްލައަށް ބަދަލުކުރުމުގެ ބާރު އޮވެގެންމެ، ރައްޔިތުންގެ މަޖިލީހުގެ ތެރެއިން ރައްޔިތުންނަށްޓަކާ މާ ބޮޑު ކަންތައްތަކެއް ކުރެވިގެން ދިޔަ މަންޒަރު ނުފެންނަކަމަށް ހީނާ ވިދާޅުވިއެވެ. އަދި ވޭތުވެދިޔަ ފަސް އަހަރު ތެރޭގައި އިސްލާމް ދީނަށާއި އިސްލާމީ ކަންތައްތަކަށް އެމްޑީޕީ ސަރުކާރުން އިހުމާލުވެ، އިސްލާމީ ކަންތައްތަކަށް ވަރަށް ބޮޑަށް ފުރައްސާރަ ކުރަމުން ދިޔަ މަންޒަރު ފެނިގެން ދިޔަކަމަށް ހީނާ ވިދާޅުވިއެވެ.
ނަބިއްޔާއަށް ފުރައްސާރަކުރީމަވެސް ރައްޔިތުންގެ މަޖިލީހަށް ހުށަހެޅި ގަރާރުތަކާއި ރިޕޯޓުތަކާއި، އަދި ހަމަ އެހެންމެ މައްސަލަތައް. މެޖޯރިޓީ، އެމްޑީޕީގެ މެޖޯރިޓީ އޮތް ރައްޔިތުންގެ މަޖިލީހުން އެ އެއްޗެހިތައް ބޭރުކޮށްލީ. އެމްޑީއެންގެ ރިޕޯޓެއްވެސް ހުށަހެޅި. އޭގަވެސް ނަބިއްޔާއަށާއި ކީރިތި ގުރުއާނަށް މަލާމާތް، ފުރައްސާރަކޮށް އިސްލާމް ދީނަށް ފުރައްސާރަކޮށްފަ ހުރި ވާހަކަތައް ހުރި. ނަބިއްޔާގެ ދިފާއުގައި ހުށަހެޅި ރިޕޯޓު އަދި އެމްޑީއެންއާ ގުޅިގެން ހުށަހެޅި ރިޕޯޓުތައްވެސް، މައްސަލަތައްވެސް، ކުއްލި މައްސަލަތައްވެސް، އަދި އެކަންކަމާ ގުޅިގެން ރައްޔިތުންގެ މަޖިލީހަށް ހުށަހެޅި މައްސަލަތައްވެސް ބޭރުކޮށްލީ. އެއީ އެމްޑީޕީގެ މެޖޯރިޓީ މަޖިލީހުން.
ހީނާ ވިދާޅުވީ އެމްޑީއެންގެ ރިޕޯޓުގައިވެސް ކަންބޮޑުވާ ކަންތައްތަކެއް ހުރިކަމަށާއި، އެ ރިޕޯޓު ލިޔުނު މީހުންނާ މެދުވެސް އެމްޑީޕީން ފިޔަވަޅެއް ނާޅާ، އެމީހުންނަށް ރައީސް އޮފީހުންނާއި ސަރުކާރުގެ އެހެން ތަންތަނުން ބޮޑެތި މަގާމުތައް ހަމަޖެއްސި ކަމަށެވެ. އަދި އެމީހުން ދިފާއުކޮށް ރާއްޖެއިން ބޭރަށް ފުރުވާލިއިރު، މައްސަތައްވެސް ނުބެލި އެމްޑީޕީ ސަރުކާރު ފެއިލްވެގެން ދިޔަތަން ފެނިގެން ދިޔަކަމަށް ހީނާ ވިދާޅުވިއެވެ.
މީގެ އިތުރުން ހީނާ ވިދާޅުވީ އިންޑިއާއިން ނަބިއްޔާއަށް ފުރައްސާރަކުރުމާ ގުޅިގެން ހުށަހެޅި މައްސަލަތައްވެސް ބޭރުކޮށްލާފައިވާ ކަމަށެވެ. އަދި ދީނީ ކަންކަމަށް އަހުލުވެރިކުރުވާ ސަލަފު ޖަމިއްޔާ ބޭން ކުރުމަށްވެސް ހުށަހަޅާ، ދިވެހިރާއްޖޭގެ ބޮޑެތި އިލްމުވެރިންނަށް ދީނީ އިލްމު ފެތުރުމުގެ ހުއްދަ ބާތިލު ކުރިކަން ހީނާ ފާހަގަކުރެއްވިއެވެ. ހީނާ ވިދާޅުވީ އޭގެ ތެރެއިން އިލްމުވެރިއެއް އަވަހާރަވީވެސް އެގޮތަށް ހުއްދަ ބާތިލްކޮށްފައި ވަނިކޮށް ކަމަށެވެ.
ހީނާ ވިދާޅުވީ އެމްޑީޕީގެ ސަރުކާރުގައި މިސްކިތްތަކަށް ކުޑަކަމުގޮސް، ގުރުއާނަށް ކުޅު ޖެހުމުގެ އިތުރުންވެސް އިސްލާމީ އާދަތަކާއި ހިލާފު އެތައް ކަމެއް ފެނިގެން ދިޔަ އިރުވެސް، އެފަރާތްތަކާ މެދު އެއްވެސް ފިޔަވަޅެއް އަޅާފައި ނުވާކަމަށެވެ. އަދި އާހިރުގައި މައްސަލަ ނިމިގެންދާއިރު ގޯސްކޮށް އަމަލުކުރި މީހާ ވަނީ ނަފްސާނީ ބަލިކަމެއް ހުންނަ މީހަކަށް ކަމަށް ހީނާ ވިދާޅުވިއެވެ.
މިސްކިތްތަކުގައި މާރާމާރީ ހިންގުމާއި، މަގުމަތީގައިވެސް އިސްލާމް ދީނަށް ފުރައްސާރަކުރުމުގެ އަމަލުތައް ހިނގާފާވާއިރު، އެމްޑީޕީ އަތުގައި ސަރުކާރާއި މަޖިލީހުގެ މެޖޯރިޓީ އޮތް އިރުވެސް އެއްވެސް ފިޔަވަޅެއް އަޅާފައި ނުވާކަމަށް ހީނާ ވިދާޅުވިއެވެ.
ހީނާ އިތުރަށް ވިދާޅުވީ ކިންގް ސަލްމާން މިސްކިތްވެސް ނިމިފައި ހުރި ނަމަވެސް، އެ މިސްކިތުގައި ނަމާދު ކުރުމުގެ ފުރުސަތު ނުދީ މިސްކިތް ނުހުޅުވާ އެތައް ދުވަހެއް ހޭދަކުރި ކަމަށެވެ.
ހީނާ ވިދާޅުވީ އެމްޑީޕީން ވަނީ އިސްލާމް ދީނުގެ ކަންކަމުގައި ވަރަށް ބޮޑަށް އިހުމާލުވެފައި ކަމަށާއި، ސަރުކާރުގެ ތެރެއިންވެސް އެއްވެސް ފިޔަވަޅެއް އެޅިފައި ނުވާ ބަޔަކަށް ރައްޔިތުންގެ މަޖިލީހުގެ މެޖޯރިޓީ އަނެއްކާ ދޭން ޖެހޭ އެއްވެސް ސަބަބެއް ނެތް ކަމަށެވެ.
5 އަހަރުގެ ދައުރުގެ ތެރޭގައި ފެނިގެން ދިޔައީ 37 ޖަލްސާއެއްގައި އެމްޑީޕީ މެމްބަރުން މާރާމާރީ ހިންގާ އަދި މަޖިލީހުގެ ތަކެއްޗަށް ގެއްލުންދީ، މަޖިލީހުގެ ތަޅުމުގައި އަނިޔާވެރި އަމަލުތައް ހިންގި މަންޒަރުކަމަށްވެސް ހީނާ ވިދާޅުވިއެވެ. ހީނާ ވިދާޅުވީ އެމްޑީޕީ މެމްބަރުންގެ އެފަދަ އަމަލުތަކުގެ ސަބަބުން އެތައް މިލިއަން ރުފިޔާއެއްގެ ގެއްލުންތަކެއް ލިބިގެންދިޔަ ކަމަށެވެ.
އެއީފަރުދީމައްސަލައެއް ޕާޓީމައްސަލައެއްނޫން