ވ. އާރަށް ކުއްޔަށް ދިނުމުގެ މުއާމަލާތާއި ގުޅިގެން ކުރީގެ ރައީސް އަބްދުއްލާ ޔާމީންގެ މައްޗަށް އިއްވާފައިވާ 11 އަހަރުގެ ޖަލު ހުކުމުގެ އިސްތިއުނާފް މައްސަލައިގެ ހުކުމް އިއްވުމަށް މާދަމާއަށް ތާވަލުކޮށްފިއެވެ.
އާރަށް ކުއްޔަށް ދޫކުރުމުގެ މުއާމަލާތާއި ގުޅިގެން ރިޝްވަތާއި މަނީ ލޯންޑަރިންގެ ކުށުގައި ޔާމީންގެ މައްޗަށް 25 ޑިސެމްބަރު 2022 ގައި އިއްވި 11 އަހަރުގެ ޖަލު ހުކުމް އެމަނިކުފާނުގެ ފަރާތްޕުޅުން ހައި ކޯޓުގައި އިސްތިއުނާފް ކުރީ 21 ފެބްރުވަރީ 2023 ގައެވެ.
މައްސަލަ ހުށަހަޅާފައި އޮންނަތާ ގާތްގަނޑަކަށް ތިން މަސް ފަހުން ކޯޓުގައި އަޑުއެހުންތައް ފަށާފައިވަނީ މިދިޔަ އަހަރުގެ ޖޫން މަހުގައެވެ.
އޭގެ ފަހުން ތިން އަޑު އެހުމެއް ބޭއްވުމަށްފަހު ފަނޑިޔާރުންގެ ބެންޗުގައި ހިމެނޭ ދެ ފަނޑިޔާރަކު ޗުއްޓީއަށް ވަޑައިގަތުމާއި ގުޅިގެން ޖުލައި މަހުގެ ތެރޭގައި އަޑު އެހުންތައް މަޑު ޖެހުނެވެ. އަދި އޮގަސްޓް މަހުގެ ތެރޭގައި އަޑު އެހުންތައް އަލުން ފެށުމަށްފަހު ފަނޑިޔާރުން ޗުއްޓީއަށް ވަޑައިގަތުމުން އޮކްޓޯބަރު މަހުގެ ތެރޭގައި އަޑު އެހުންތައް އަނެއްކާވެސް މަޑު ޖެހިގެން ދިޔައީއެވެ.
ނޮވެމްބަރު މަހުގެ ތެރޭގައި އަޑު އެހުންތައް އަލުން ފަށައި އެ މަހުގެ 21 އަށް އަޑު އެހުންތައް މުޅިން ނިންމާލާ ހުކުމް ކުރުމާ ހަމައަށް ވަނީ ގޮސްފައެވެ.
މައުލޫމާތު ލިބިފައިވާގޮތުގައި ރައީސް ޔާމީނަށް ހުކުމް ކުރުމުގެ މަޖިލިސް ބޭއްވުމަށް ނިންމާފައިވަނީ މާދަމާ 1 ޖަހާއިރުއެވެ.
ގއ. ވޮޑަމުލާ ކުއްޔަށް ދޫކުރުމުގެ މުއާމަލާތާ ގުޅިގެން ވެސް މަނީ ލޯންޑްރިންގެ ކުށް ސާބިތުވެ، ޔާމީން ފަސް އަހަރަށް ޖަލަށްލާން 2019 ވަނަ އަހަރު ކްރިމިނަލް ކޯޓުން ހުކުމްކުރިއެވެ. ނަމަވެސް 2021 ވަނަ އަހަރު ސުޕްރީމް ކޯޓުން ވަނީ އެ ހުކުމް ބާތިލްކޮށް، އެމަނިކުފާނު މިނިވަންކޮށްފައެވެ.
