މަހަށް ނުކުމެ އުޅެނިކޮށް ގެއްލުނު ދޯނި ހޯދަން އަސްކަރީ ޑްރޯން ބޭނުން ކުރަން ފަށައިފިއެވެ.
އެމްއެންޑީއެފުން މިރޭ ބުނީ، ގެއްލުނު ދޯނި ހޯދުމަށް ދޯނި މ. މުލީގައި އޮންނަ ކޯސްޓްގާޑް ހާބަރކްރާފްޓް 114 މިރޭގެ 23:20 އިން ފެށިގެން ހޯދުމުގެ މަސައްކަތްކުރަމުން ދާއިރު، ވައިގެ މަގުންވެސް ހޯދުމުގެ މަސައްކަތްވަނީ ފަށާފައި ކަމަށެވެ.
”އެމްއެންޑީއެފް ވައި ބާރުން ވަނީ މިހާރު ދޯނި ހޯދުމަށްޓަކައި “ ޔޫއޭވީ“ އެ ސަރަހައްދަށް ދިއުމަށް އުދުއްސާލައިފައި“ އެމްއެންޑީއެފުން ބުންޏެވެ.
ކޯސްޓްގާޑުގެ ފާސްޓް އިންޓަރސެޕްޓަރ ”ކްރާފްޓް“ މާފަތް ވެސް ދަނީ ދޯނި ހޯދުމަށް މަސައްކަތް ކުރަމުން ކަމަށް އެމްއެންޑީއެފުން ބުންޏެވެ.
މި ހާދިސާ އާއި ގުޅޭގޮތުން ފުލުހުން ބުނީ، މިއަދު ހަވީރު މ. މަޑުއްވަރިން ދޯންޏެއްގައި މަހަށް ދިޔަ ދެ މީހަކު ހަބަރެއްނުވެ ވީނުވީއެއް ނޭނގި ގެއްލިފައިވާކަމުގެ މަޢުލޫމާތު މިރޭ 22:06 އެހާކަންހާއިރު ފުލުހުންނަށް ލިބިފައިވާ ކަމަށެވެ.
”މި ހާދިސާގެ މަޢުލޫމާތު ފުލުހުންނަށް ލިބުމާއެކު މ. އަތޮޅު ފުލުހުންގެ ލޯންޗު ދަނީ ދޯންޏާއި މީހުން ހޯދުމުގެ މަސައްކަތުގައި ހަރަކާތްތެރިވަމުން. އަދި މިކަމުގެ މަޢުލޫމާތު އެމް.އެން.ޑީ.އެފް އާ ވަނީ ހިއްސާކުރެވިފައި.“ ފުލުހުން ބުންޏެވެ.
މި ދޯނީގައި މަހަށް ގޮސްފައިވަނީ ދިވެހި ދެ ފިރިހެނުންނެވެ.
މި ދޯންޏާއި އެ މީހުންނާ ބެހޭ އެއްވެސް މަޢުލޫމާތެއް ލިބިފައިވާނަމަ ފުލުހުންގެ އެމަރޖެންސީ ނަންބަރު 119 އަށް ނުވަތަ ކޯސްޓްގާރޑަށް ގުޅުއްވައި އެމަޢުލޫމާތެއް ހިއްސާކުރަން ފުލުހުން އެދެއެވެ.
