ފައިސާ ޗާޕު ކުރުން ހުއްޓާލުމަކީ ރާއްޖޭގެ އިގްތިސާދު ކޮޅަށް ޖެހުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކުރެއްވި އެންމެ މުހިންމު މަސައްކަތް ކަމަށް ޕީޕީއެމް/ޕީއެންސީގެ ރައްޔިތުންގެ މަޖިލީހުގެ ތަރުޖަމާނު ހީނާ ވަލީދު ވިދާޅުވެއްޖެއެވެ.
ހީނާ މިހެން ވިދާޅުވީ މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ. އޭނާ ވިދާޅުވީ، ފައިސާ ޗާޕު ނުކޮށް، މިހާރު ސޮވްރިން ޑިވެލޮޕްމަންޓް ފަންޑަށް 30 މިލިއަނަށް ވުރެ ގިނަ ޑޮލަރު ޖަމާވެފައި ހުރިކަން އުފަލާއިއެކު ފާހަގަ ކުރައްވާ ކަމަށެވެ.
މި ސަރުކާރު ހަވާލުވީއިރު، ގިނަ މަޝްރޫއުތައް ހުއްޓިފައި ހުރިކަން ފާހަގަކުރައްވައި ހީނާ ވިދާޅުވީ، ރައީސް މުއިއްޒު ވެރިކަމާއި ހަވާލުވެވަޑައިގަތުމާއިއެކު މަޝްރޫއުތައް އަލުން ފެށިފައިވާ ކަމަށެވެ. އަދި މަސްވެރިންނަށް ނުދީ ހުރި ފައިސާ ދައްކާ، އެއްކޮށް ހަލާސް ކުރެވިފައިވާ ކަމަށް ވެސް ވިދާޅުވިއެވެ.
ފައިސާ ޗާޕު ކުރުން ހުއްޓާލުމަކީ ރާއްޖޭގެ އިގްތިސާދު ކޮޅަށް ޖެހުމަށް ރައީސް ޑރ.މުހައްމަދު މުއިއްޒު ކުރެއްވި އެންމެ މުހިންމު މަސައްކަތް ކަމަށް ހީނާ ވިދާޅުވިއިރު، އެމްޑީޕީގެ ވެރިކަމުގައި، ފައިސާ ޗާޕު ކުރުން ހުއްޓާލަން، އިންޓަރނޭޝަނަލް މަނިޓަރި ފަންޑު (އައިއެމްއެފް) އިން ލަފާ ދިން ނަމަވެސް އެކަން ކޮށްފައެއް ނުވެއެވެ.
ިމި ސަރުކާރުން ފައިސާ ޗާޕު ކުރުން ހުއްޓާލުމުން، އައިއެމްއެފް އިން ވަނީ އެކަމަށް ވަރަށް ބޮޑަށް ތައުރީފު ކޮށްފައެވެ.
