ރައްޔިތުންގެ މަޖިލީހުގެ އިންތިހާބުގެ ވޯޓުލުން ފެށިގެން އޮމާން ކަމާއިއެކު އެބަ ކުރިއަށް ދެއެވެ.
މިއަދުގެ ވޯޓުލުން ފެށީ ހެނދުނު 8:00 ގައެވެ. އިލެކްޝަން ކޮމިޝަން (އީސީ) އިން ނިންމާފައި އޮތީ ވޯޓްލުން ހަވީރު 5:30 އާ ހަމައަށް ކުރިއަށް ގެންދިއުމަށެވެ.
މަޖިލީހުގެ 93 ދާއިރާއަކަށް 368 ކެންޑިޑޭޓުން ވާދަކުރައްވައެވެ.
މި އިންތިހާބުގައި ވޯޓްލުމުގެ ހައްގު 284،663 މީހަކަށް ލިބިގެންވާއިރު، އޭގެ ތެރޭގައި ހިމެނެނީ 145،302 ފިރިހެނުންނާއި 139،361 އަންހެނުންނެވެ.
އީސީން ބުނީ، މިއަދު 9 ޖެހުމާއި ހަމައަށް ވޯޓުލީ، 8.68 އިންސައްތަ މީހުން ކަމަށާއި 91.32 އިންސައްތަ މީހުން އަދި ވޯޓު ނުލާ ކަމަށެވެ. ނިހާތަނަށް ވޯޓުލީ، ވޯޓުލުމުގެ ހައްގު ލިބިފައިވާ މީހުންގެ ތެރެއިން، 24703 މީހުންނެވެ. އެއީ 7803 އަންހެނުންނާއި، 16،900 ފިރިހެނުންނެވެ.
މި ފަހަރުގެ އިންތިހާބުގައި 284663 މީހަކަށް ވޯޓު ލުމުގެ ހައްގު ލިބިގެންވެއެވެ.
މި އިންތިހާބުގައި 603 އަށް ވުރެ ގިނަ ވޯޓްފޮށި ބަހައްޓާފައިވެއެވެ.
މި ފަހަރު ރާއްޖެއިން ބޭރުގައި ވޯޓްފޮށި ބެހެއްޓީ ތިން ގައުމެއްގައެވެ.
އެއީ އިންޑިއާ، ސްރީ ލަންކާ އަދި މެލޭޝިއާގަ އެވެ. އެ ގައުމުތަކުގައި ވެސް ވޯޓްލުން ކުރިއަށް ގެންދަނީ ރާއްޖޭގައި ވެސް ވޯޓްލާން ކަނޑައަޅާފައިވާ ގަޑިތަކާ ދިމާވާ ގޮތަށެވެ.
މަޖިލީހުގެ އިންތިހާބުގެ ވޯޓްލުން މިއަދު ފެށި އިރު އީސީން ވަނީ ވީހާ ވެސް އަވަހަކަށް އާންމުން ނުކުމެ ވޯޓްލާން އިލްތިމާސްކޮށްފައެވެ.
