މިއަދު ކުރިއަށްގެންދިޔަ 20 ވަނަ ރައްޔިތުންގެ މަޖިލިސް އިންތިހާބުގެ ވޯޓުލުން ނިމުމާއެކު ބައެއް ވޯޓު ފޮށިތައް ގުނުމުގެ މަސައްކަތް ފަށައިފިއެވެ.
މަޖިލިސް އިންތިހާބުގެ ވޯޓުލުން މިއަދު ހެނދުނު 8:00 ގައި ފަށާފައިވާއިރު ކިއުތައް ބަންދުކޮށްފައިވަނީ 5:30 ގައެވެ. ކިއު ބަންދު ކުރި ވަގުތު ކިއުގައި ތިބި މީހުންނަށް އިލެކްޝަންސް ކޮމިޝަނުން ވަނީ ވޯޓުލުމުގެ ފުރުސަތު ދީފައެވެ.
5 ޖެހުމާ ހަމައަށް ވޯޓުލީ މީހުންގެ ހިސާބުތައް އެ ކޮމިޝަނުން އާއްމުކޮށްފައިވާއިރު، އެ ވަގުތާއި ހަމައަށް ޖުމްލަ 207,693 މީހަކު ވަނީ ވޯޓު ލާފައެވެ.
މިފަހަރުގެ މަޖިލިސް އިންތިހާބުގައި 284,663 މީހުންނަށް ވޯޓުލުމުގެ ހައްގު ލިބިފައިވާއިރު އޭގެ ތެރޭގައި ހިމެނެނީ 139,361 އަންހެނުންނާއި 145,302 ފިރިހެނުންނެވެ. އަދި 5 ޖެހުމާ ހަމައަށް 76,970 މީހުން ވޯޓުލުމުގެ ހައްގު އަދާކޮށްފައި ނުވާކަމަށް އިލެކްޝަންސް ކޮމިޝަނުން ބުންޏެވެ.
މި އިންތިހާބުގައި 603 އަށް ވުރެ ގިނަ ވޯޓްފޮށި ބަހައްޓާފައިވާއިރު ރާއްޖެއިން ބޭރުގެ ތިން ގައުމެއްގައިވެސް ވަނީ ވޯޓު ފޮށި ބަހައްޓާފައެވެ. އެއީ އިންޑިއާ، ސްރީ ލަންކާ އަދި މެލޭޝިއާގަ އެވެ.
މިއަދުގެ އިންތިހާބުގައި މާ ގިނަ ހަމަނުޖެހުންތަކެއް ހިނގާފައި ނުވި ނަމަވެސް ރައްޔިތުންގެ މަޖިލީހުގެ އިންތިހާބުގެ ސެކިއުރިޓީ އޮޕަރޭޝަނުގައި ތިން މީހަކު ހައްޔަރުކޮށްފައިވާކަމަށް ފުލުހުން ވަނީ ބުނެފައެވެ.
