އެންޓި ކޮރަޕްޝަން ކޮމިޝަން(އޭސީސީ) އިން ސާވިސް ޗާޓަރު އިފްތިތާހު ކޮށްފިއެވެ.
އެތަނުން މިފަދަ ޗާޓަރެއް އިފުތިތާހުކުރީ ކޮމިޝަނުން ފޯރުކޮށްދޭ ހިދުމަތްތަކަކީ ހިދުމަތް ލިބިގަންނަ މީހުން ބޭނުންވާ ފެންވަރުގައި ފޯރުކޮށް ދެވޭ ހިތްހަމަޖެހޭ ހިދުމަތްތަކެއް ދެވޭ މުއައްސަސާއަކަށް ހެދުމުގެ މަގުސަދުގައެވެ.
އެގޮތުން، އެ ތަނުން ދޭ ހިދުމަތްތަކާއި، އެ ހިދުމަތްތައް ހޯދޭނެ ގޮތްތަކާއި، ހިދުމަތް ފޯރުކޮށްދިނުމަށް ކަނޑައެޅިފައިވާ ވަގުތުތައް އެއްތާކުން ފެންނާނެ ގޮތަށް އެކުލަވާލާފައިވާ މި ސާވިސް ޗާޓަރު އޭސީސީގެ ވެބްސައިޓްގައި މިހާރު ވަނީ އާންމުކޮށްފައެވެ.
އޭސީސީން ބުނި ގޮތުގައި އެ ކޮމިޝަނުގެ އަމާޒަކީ ކޮމިޝަނުން އާއްމު ރައްޔިތުންނަށް ފޯރުކޮށްދޭ ހިދުމަތްތަކަކީ ވީހާ ވެސް އަވަސްކޮށް ރަނގަޅު ފެންވަރެއްގައި ފޯރުކޮށްދެވޭ ހިދުމަތްތަކަށް ހެދުން ކަމަށެވެ.
އަދި ކޮމިޝަނުގެ ގާނޫނީ ޒިންމާ އަދާކުރުމަށް ކުރަމުން އަންނަ މަސައްކަތްތަކާއި ހިދުމަތްތައް ވީހާވެސް ފަސޭހައިން ރައްޔިތުންނަށް ލިބޭނެ ގޮތް ހެދުން ކަމަށެވެ.
