ދިވެހިރާއްޖޭގެ ކުޑަކުދީންގެ ދުވަހު ނެރުއްވި ހިތާބުގައި، ރައީސުލްޖުމްހޫރިއްޔާ ޑރ.މުހައްމަދު މުއިއްޒު ފަލަސްތީނުގެ ކުޑަ ކުދިންގެ ހަނދާންތައް އާ ކުރައްވައި، އެކުދިންނަށް ހެޔޮ ދުއާ ކުރައްވައިފިއެވެ.
ރައީސް މުއިއްޒުގެ ހިތާބުގައި ކުޑަކުދީންގެ ދުވަހެއްގައި، ހިތަށް ވެރިވާ އުފާވެރި އަދި އުއްމީދީ އިހްސާސްތަކާއެކު، ހިތާމަވެރި އަސަރުކުރުވާކަމެއް އެބައޮތްކަން ފާހަގަކުރައްވައި، އެއީ، ފަލަސްތީނުގެ ބިމުގައި އަނިޔާ ލިބި، ބިކަ ހާލުގައި ޖެހެމުންދާ އެތައް ހާސް ކުޑަކުދީންގެ ހަނދުމައިން ކަމުގައި ވިދާޅުވިއެވެ.
”އިޒްރޭލުގެ އަނިޔާވެރި އަތްތަކުގެ ޝިކާރައަކަށްވެ، ހަޔާތުގެ ޅަނދޮޅު ފޯވަހީގެ އެންމެ ހިތްފަހި ދުވަސްތަކުގެ އުފަލާއި، ތައުލީމާއި، އާއިލީ ލޯބިން މަހުރޫމްވަމުން އެދާ މައުސޫމް ކުދީންނަކީ ހަމަ އަޅުގަނޑުމެންގެވެސް ދަރީންނެވެ. އެ ކުދީންގެ ތެރެއިން ޝަހީދުވާ ކޮންމެ ކުއްޖަކަށް ސުވަރުގޭގައި ކީރިތި ﷲ ވައުދު ވެވޮޑިގެންފައިވާ މަތިވެރި ނިއުމަތް މިންވަރު ކުރައްވާށިއެވެ. އަނިޔާލިބި ގެދޮރާއި ސަހަރޯވެރީން ގެއްލި ނިކަމެތިވަމުންދާ ކޮންމެ ކުއްޖަކަށް ކީރިތި ﷲގެ ރަޙްމަތާއި މަދަދުގެ ހާސްދޮރު ހުޅުއްވާށިއެވެ. އާމީން.“ ރައީސްގެ ހިތާބުގައިވެއެވެ.
މި އަހަރުގެ އޮކްޓޯބަރު މަހުގެ ހަތްވަނަ ދުވަހު، ފަލަސްތީނުގެ ހަމާސް ޖަމާއަތާއި އިޒްރޭލުގެ ޔަހޫދީންނާއި ދެމެދު ފެށިގެންދިޔަ ހަނގުރާމައިގައި، އިޒްރޭލުން ފަލަސްތީނުގެ 33،000އަށްވުރެ ގިނަ މީހުން ވަނީ ޝަހީދު ކޮށްލާފައެވެ. އޭގެ ތެރޭގައި 14000 ތުއްތު ކުދިން ހިމެނޭ ކަމަށް ބައިނަލްއަގްވާމީ މީޑިއާތަކުން ރިޕޯޓު ކުރެއެވެ.
