ސައުދީ ފަންޑް ފޮރ ޑިވެލޮޕްމަންޓް (އެސްއެފްޑީ)ގެ ލޯނު އެހީގެ ދަށުން، ހުޅުމާލެ ފުރަތަމަ ފިޔަވައްސާ ދެވަނަ ފިޔަވަހި ގުޅާލުމަށް ކުރިއަށްގެންދިޔަ ބްރިޖް މަޝްރޫއުގެ ނިމުން ފާހަގަކޮށްފިއެވެ.
މި މަޝްރޫއުގެ ނިމުން ފާހަގަކޮށް، ބްރިޖުތައް އިފްތިތާހުކޮށްދެއްވީ މިހާރު ރާއްޖެ ވަޑައިގެން އުޅުއްވާ އެސްއެފްޑީގެ ސީއީއޯ ސުލްތާން އަބްދުލްރަހްމާން އަލް-މަރްޝަދުއެވެ.
ހުޅުމާލެ ފޭސް 1 އަދި 2 ގުޅާލުމަށް ހެދި 4 ބްރިޖްގެ މަސައްކަތާ، ޗެނަލްގެ މަސައްކަތުގެ އިތުރުން، ބަނދަރު ސަރަހައްދު ތަރައްގީ ކުރުމާއި އިގްތިސާދީ ސަރަހައްދު ބްރިޖަކުން ގުޅުވައިލުމުގެ މަސައްކަތް ވެސް ކޮށްފައި ވަނީ އެސްއެފްޑީއެގެ އެހީގައެވެ.
އެ ފަންޑުން ފޭސް 2 ގެ އުމްރާނީ ތަރައްގީއަށް 80 މިލިއަން ޑޮލަރުގެ އެހީ ދީފައިވެއެވެ.
ފޭސް 2 ބްރިޖުތަކާއި ޗެނަލްތަކުގެ މަސައްކަތުގެ ނިމުން ފާހަގަކުރަން ބޭއްވި މި ރަސްމިއްޔާތުގައި ވާހަކަ ދައްކަވަމުން އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވަނީ އެސްއެފްޑީގެ އެހީގައި ހުޅުމާލޭގައި ކުރިއަށް ގެންދިޔަ މަސައްކަތްތަކުގެ ސަބަބުން އެތަނަށް އިންގިލާބީ ބަދަލުތައް އައިސްފައިވާކަން ފާހަގަކުރައްވައިފައެވެ.
އެގޮތުން އޭނާ ވިދާޅުވީ އެޗްޑީސީގެ އާރބަން އައިލް ގުޅުވައިލާ ބުރިޖާއި ޗެނަލްތަކާއިއެކު ހުޅުމާލެ ސަރަހައްދަށް އިންގިލާބީ ބޮޑު ބަދަލުތަކެއް އައިސްފައިވާ ކަމުގައެވެ.
ފަޒުލް ވިދާޅުވީ އެސްއެފްޑީގެ އެހީގައި ކުރިއަށްގެންދިޔަ ޕްރޮޖެކްޓުގެ ސަބަބުން ހުޅުމާލޭގައި ދިރިއުޅޭ މީހުންނަށް ބޮޑު ފަސޭހައަކާއި ހިތްހަމަޖެހުން ލިބިގެންދިޔަ ކަމަށާއި ޓްރާންސްޕޯޓަށް ލިބުނު ލުއި ފަސޭހައިގެ އިތުރުން މި މަސައްކަތުގެ ސަބަބުން ވިޔަފާރިވެރިންނަށް ފަސޭހަވެ، އިގްތިސާދީ ގޮތުން ވެސް ފައިދާވެފައިވާ ކަމުގައެވެ.
”މި ޕްރޮޖެކްޓުގަ އަމަލީ ގޮތުން ބައިވެރިވާ، އެހެނިހެން ސްޓޭޭކްހޯލްޑަރސްއިންނަށް މި ފުރުސަތުގައި އަޅުގަނޑު ފަށްފަށުން ޝުކުރު އަދާކޮށްލަން ބޭނުންވޭ.“ ފަޒުލް ވިދާޅުވިއެވެ.
ފަޒުލް އިތުރަށް ވިދާޅުވީ، އޭނާގެ އުއްމީދަކީ، މި މަޝްރޫއުގެ އަލީގައި ކުރިއަށް އޮތް މުސްތަގްބަލު، އެޗްޑީސީ އާއި މާލެ ސަރަހައްދުގައި ސަރުކާރުން ގިރާ ކުރަން ބޭނުންވާ ހަރުފަތްތައް އިތުރަށް ފުޅާވެ، ހަރުދަނާވެ، އަދި ރައްޔިތުންނަށް ގާތުން ހިދުމަތްތައް ދެވުން ކަމަށެވެ.
މިއަދުގެ ހާއްސަ ރަސްމިއްޔާތުގައި ވާހަކަ ދައްވަމުން ސައުދީ ފަންޑް ފޮރ ޑިވެލޮޕްމަންޓްގެ ސީއީއޯ ސުލްތާން އަބްދުލްރަހްމާން އަލް-މަރްޝަދު ވިދާޅުވީ ސައުދީއާއި ރާއްޖެއާ އޮތް ގާތް ގުޅުމުގެ ތެރެއިން މިހާތަނަށް 16 ލޯނު އެއްބަސްވުމެއްގެ ދަށުން، 470 މިލިއަން ޑޮލަރުގެ އެހީ ރާއްޖެއަށް ފޯރުކޮށްދީފައިވާކަމަށެވެ.
ހުޅުމާލެ ބްރިޖްތައް ތަރައްގީކުރުމުގެ މަޝްރޫއުއަކީ 80 މިލިއަން ޑޮލަރުގެ ބޮޑު އެހީއެއްކަން ފާހަގަކުރައްވައި، ސުލްތާން ވިދާޅުވީ، ކުރިއަށް އޮތްތަނުގައިވެސް ރާއްޖޭގެ ތަރައްގީއަށް އެހީތެރިވެދެއްވާނެކަމަށެވެ.
މިގޮތުން ރާއްޖެއަށް އިގްތިސާދީ ގޮތުންނާއި އިޖްތިމާއީ ގޮތުން ވެސް އެހީ ވާނެ ކަމަށާއި، ފެނާ ނަރުދަމާ ގާއިމު ކުރުމާއި ސިއްހީ ދާއިރާފަދަ ދާއިރާތަކުން މިހާތަނަށް އެހީތެރިކަން ފޯރުކޮށްދީފައިވާނެ ކަމަށް އޭނާ ވިދާޅުވިއެވެ.
