ކޮޅިގަނޑެއްގައި ޖެހި، ސަލާމަތް ނުވެވިގެން އުޅުނު ބަޔަކަށް ސްޓެލްކޯގެ މުވައްޒަފުން އެހީވެ، ސަލާމަތް ކޮށްފިއެވެ.
ރާއްޖެއަށް މިހާރު ކުރަމުންދާ ވިއްސާރައިގައި މޫސުން ގޯސްވެ، މިއަދު ހަވީރު ކޮޅިގަނޑެއް އައި ވަގުތު އއ. ތޮއްޑޫގައި މޫދަށް އެރި ތިބި ކުދިންތަކެއް އެ ކޮޅިގަނޑުގައި ޖެހި އެއްގަމަށް ނާދެވިގެން އުޅުނެވެ.
އެ ކުދިން ސަލާމަތްކޮށް އެއްގަމަށް ގެނައުމަށް އެވަގުތު އެ ސަރަޙައްދުގައި ތިބި ސްޓެލްކޯގެ ހިތްވަރުގަދަ މުވައްޒަފުން ވަނީ ހަރަކާތްތެރިވެފައެވެ.
މި ހާދިސާއާއި ގުޅޭގޮތުން އއ. އަތޮޅު ޕޮލިސް ސްޓޭޝަނުން ބުނެފައިވަނީ ތޮއްޑޫ ސްޕޯޓްސް އޭރިއާގެ ބޭރުގައި ޖެޓްސްކީ އެޅުމަށްޓަކައި އަޅާފައި އޮތް ކަނދުފައްޗެއްގައި ހަތަރު ކުޑަކުދިން ތާށިވެފައިތިބިކަމުގެ މައުލޫމާތު ތޮއްޑޫ ޕޮލިސް ޕޯސްޓަށް ލިބުމުން އެކުދިން ސަލާމަތްކުރުމުގައި ހަރަކާތްތެރިވި ކަމަށެވެ.
ސްޓެލްކޯ އިން ބުނީ މިއަދުގެ ކޮޅިގަނޑުގެ ސަބަބުން ބިންދައިގެންދިޔަ ބައެއް ގަސްގަހުގެ ބައިތައް ގޭގޭގެ ފުރާޅަށް ފޭބުމާއި ގުޅިގެން ލިބުނު ގެއްލުންތަކުން ސަލާމަތް ކުރުމަށްވެސް އެ ކުންފުނީގެ ހީވާގި މުވައްޒަފުން ވަނީ އެހީތެރިކަން ފޯރުކޮށްދީފައި ކަމަށެވެ.
ސްޓެލްކޯ އިން ބުނީ ރައްޔިތުންނަށް ދިމާވާ މިފަދަ ކޮންމެ ކަމެއްގައި އެ ކުންފުނީގެ މުވައްޒަފުން އަބަދުވެސް ދެމިތިބޭނީ ހިތްވަރާއި ކެރުމާއިއެކު އެންމެ އިސް ސަފުގައި، އިހްލާސްތެރިކަމާއިއެކު ރައްޔިތުންގެ ހިދުމަތުގައި ކަމަށެވެ.
