ދާރުއްސަލާމް އާއި ދާރުލްއަރްޤަމްގެ ނަމުގައި އާ ވަގުފް އިމާރާތްތަކެއް އެޅުމަށް މަސައްކަތް ކުރަމުންދާ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިރޭ ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ކީރިތި ޤުރުއާން ކިޔެވުމުގެ 36 ވަނަ ގައުމީ މުބާރާތުގެ ނަތީޖާ ފާޅު ކުރުމަށް މިރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
އެމަނިކުފާނު ވިދާޅުވީ، ދިވެހި ދައުލަތް ހިންގަވަން ބޭނުންފުޅުވަނީ ދިވެހިންނަށް އެންމެ ލާބަ ހުރި ގޮތަށް ކަމަށެވެ.
”އެގޮތުން އަޅުގަނޑުމެންގެ މާތް ވެގެންވާ އިސްލާމްދީނަށް ނަސްރު ދިނުމަކީ އަޅުގަނޑު އެންމެ އިސްކަން ދޭނެ ވާޖިބު.“ ރައީސުލްޖުމްހޫރިއްޔާ ވިދާޅުވިއެވެ.
އެކަމަށްޓަކައި، ކީރިތި ޤުރުއާނުގެ ޢިލްމު ފެތުރުމަށް ސަރުކާރުން ހާއްސަ އިސްކަމެއް ދެއްވާނެ ކަމަށް ރައީސް ވިދާޅުވިއެވެ. ރައީސް ވިދާޅުވީ، ޤުރުއާން ހިތުދަސް ހާފިޒުން އުފެއްދުމަށާއި، އެކަމަށް ހިތްވަރު ދީ، މަގުކޮށައިދިނުމަށް ވެސް ސަރުކާރުން ހާއްސަ ސަމާލުކަމެއް ދެއްވާނެ ކަމަށެވެ.
އެމަނިކުފާނު ވިދާޅުވީ، ދިވެހީންގެ ދިރިއުޅުން އިސްލާމީ ސަޤާފަތުން ޒީނަތްތެރިވުމަކީ އެންމެ ލާބަހުރި ގޮތް ކަމަށެވެ. ކީރިތި ޤުރުއާނުގެ އިލްމު ފެތުރުމަށް ސަރުކާރުން އަވަސް، އަދި ހަލުވި ފިޔަވަޅުތަކެއް އަޅަމުންދާ ކަމަށް ވެސް ރައީީސް ވިދާޅުވިއެވެ.
ދީނީ އިލްމާއި ޤުރުއާނުގެ ފަންނު ކުރިއަރުވަން ކުރަން ޖެހޭ ހޭދައާއި މާލީ ފުދުންތެރިކަން އިތުރުވާނެ ގޮތްތައް ހޯދުމަކީ މި ސަރުކާރުގެ ވިސްނުންކަން ފާހަގަކުރައްވައި ރައީީސް ވިދާޅުވީ، ދާރުއްސަލާމްގެ ނަމުގައި އާ ވަޤުފު އިމާރާތެއް އެޅުމަށް މަސައްކަތް ކުރެވެމުންދާ ކަމަށެވެ. މިހާރު މާލޭގައި، ދާރުލްއީމާނުގެ ނަމުގައި ހުރީ އެންމެ ވަގުފް އިމާރާތެއް ކަމަށާއި، އެ އިމާރާތަށް އަހަރަކު ލިބެނީ ހައެއްކަ މިލިއަން ރުފިޔާ ކަމަށް އެމަނިކުފާނު ވިދާޅުވިއެވެ.
”ހަމަ އެހެންމެ، ދާރުލްއަރުޤަމްގެ ނަމުގައި، އެހެން ވަގުފު އިމާރާތެއް އެޅުމަށް ބިމެއް ހަމަޖެހި، ބިން ރަޖިސްޓްރީ ކުރުމުގެ މަސައްކަތް، އިސްލާމީ ކަންތައްތަކާ ބެހޭ ވުޒާރާއިން ދަނީ ކުރިއަށް ގެންދަމުން.“ ރައީީސް ވިދާޅުވިއެވެ.
ކީިރިތި ޤުރުއާނަކީ ނަފްސުތަކަށް ޝިފާ ލިބިދޭ އަޅުކަމެއްކަން ފާހަގަކުރައްވައި، ރައީސް އިތުރަށް ވިދާޅުވީ، ޤުރުއާން ކިޔެވުމުގެ ފަންނު، ރާއްޖޭގައި ކުރިއަރާދާތަން ފެނުމަކީ ވަރަށް ބޮޑު ހިތްހަމަޖެހުމެއް ކަމަށެވެ.
