ކީރިތި ޤުރުއާން ކިޔެވުމުގެ ޤައުމީ މުބާރާތަކީ ރާއްޖޭގައި ބާއްވާ އިނާމުތައް އެންމެ އަގު ބޮޑު، އަދި އިނާމުތައް އެންމެ ގިނަ މުބާރާތަށް ހައްދަވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މި ވައުދުވެވަޑައިގަތީ، ކީރިތި ޤުރުއާން ކިޔެވުމުގެ 36 ވަނަ ޤައުމީ މުބާރާތުގެ ނަތީޖާ ފާޅު ކުރުމަށް ބޭއްވި ރަސްމިއްޔާތުގައެވެ.
ރައީސްގެ ވާހަކަފުޅުގައި ޤުރުއާން ކިޔެވުމުގެ ފަންނު ކުރިއެރުވުމަށާއި، ޤުރުއާން ހިތުދަސް ހާފިޒުން އިތުރު ކުރުމަށް އެމަނިކުފާނުގެ ސަރުކާރުން ހާއްސަ ސަމާލުކަމެއް ދެއްވާނެކަމުގެ ޔަޤީންކަން ދިވެހި ރައްޔިތުންނަށް ދެއްވިއެވެ.
”އަޅުގަނޑު ދެކޭގޮތުގައި، ރާއްޖޭގައި ހުރި އަހްލާގީ ހުރިހާ މައްސަލަތަކުގެ ހައްލަކީ ކީރިތި ޤުރުއާން.“ އެމަނިކުފާނު ވިދާޅުވިއެވެ.
އެމަނިކުފާނު ވިދާޅުވީ، ދިވެހީންގެ ދިރިއުޅުން އިސްލާމީ ސަޤާފަތުން ޒީނަތްތެރިވުމަކީ އެންމެ ލާބަހުރި ގޮތް ކަމަށެވެ.
ކީރިތި ޤުރުއާނުގެ އިލްމު ފެތުރުމަށް ސަރުކާރުން އަވަސް، އަދި ހަލުވި ފިޔަވަޅުތަކެއް އަޅަމުންދާ ކަމަށް ވެސް ރައީީސް ވިދާޅުވިއެވެ.
ދީނީ އިލްމާއި ޤުރުއާނުގެ ފަންނު ކުރިއަރުވަން ކުރަން ޖެހޭ ހޭދައާއި މާލީ ފުދުންތެރިކަން އިތުރުވާނެ ގޮތްތައް ހޯދުމަކީ މި ސަރުކާރުގެ ވިސްނުންކަން ފާހަގަކުރައްވައި ރައީީސް ވިދާޅުވީ، ދާރުއްސަލާމް އާއި ދާރުލްއަރްޤަމްގެ ނަމުގައި އާ ވަޤުފު އިމާރާތެއް އެޅުމަށް މަސައްކަތް ކުރެވެމުންދާ ކަމަށެވެ.
