ދިވެހީން އެދޭ ދިވެހީންގެ ރާއްޖެއެއް ބިނާ ކޮށްދެއްވާނެކަމުގެ ޔަގީންކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްވާފައިވާ ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް ވިދާޅުވެއްޖެއެވެ.
ރާއްޖޭގެ މިނިވަން ދުވަހުގެ ރަސްމީ ޖަލްސާގައި، ރައީސް މުއިއްޒު ރޭ ދެއްކެވި ވާހަކަފުޅުތަކާ ގުޅޭގޮތުން އަބްދުއްރަހީމް ވިދާޅުވީ ފަހުރުވެރި މިނިވަން ދުވަހު ރައީސް މުއިއްޒު ރައްޔިތުންނަށް އިތުބާރު ދެއްވީ ދިވެހީން އެދޭ ދިވެހީންގެ ރާއްޖެއެއް ބިނާކޮށް ދެއްވާނެކަމަށް ކަމުގައެވެ.
ރައީީސް މުއިއްޒު ރޭ ދެއްކެވި ވާހަކަފުޅުގައި، ގައުމުގެ މިނިވަންކަމާ ސިޔާދަތު ހިމާޔަތްކޮށް، ރައްކާތެރި ކުރައްވާނެ ކަމަށް އެމަނިކުފާނު ވިދާޅުވަމުން ގެންދަވާ ބަސްފުޅުތައް ތަކުރާރު ކުރައްވާފައިވެއެވެ.
”އެ ރާއްޖޭގައި ތަފާތުކުރުމެއްނެތި ހަމަ ކޮންމެ މީހަކަށްމެ އަދުލު އިންސާފު ޔަގީންވާނެކަމަށް.ވފުދުންތެރި ދިރިއުޅުމެއް ލިބިގެންދާނަކަމަށް. ގެއްލިފައިވާ ގައުމާއި ރައްޔިތުންގެ ހައްގުތައް ހޯއްދަވައި ދެއްވާނެކަމަށް.“
އަބްދުއްރަހީމް ވިދާޅުވީ، ރައީީސް މުއިއްޒުގެ ތަގުރީރުގައި ގައުމުގެ މިނިވަންކަމުގެ ރަތް ރޮނގު ފިސާރި ފަލަކޮށް ދަމައި، އޭގެ އެންމެ ފުރިހަމަ މާނައިގައި މިނިވަންކަން ކަށަވަރުކޮށް ދެއްވާނެކަމުގެ ޔަގީންކަން ވެސް ދެއްވައިފި ކަމުގައެވެ.
