މި ސަރުކާރުގެ ހާރިޖީ ސިޔާސަތަކީ ހުރިހާ ގައުމަކާ އެކު ވެސް ގާތް ގުޅުމެއް ބޭއްވުން ކަމަށާއި، އިޒްރޭލު ފިޔަވައި އެހެން ގައުމުތަކަކީ ”އަޅުގަނޑުމެންގެ ރަހުމަތްތެރިން“ ކަމަށް ފޮރިން މިނިސްޓަރު މޫސާ ޒަމީރު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ޕީއެސްއެމްގެ ”ރާއްޖެ މިއަދު“ ޕްރޮގްރާމްގައި ވާހަކަ ދައްކަވަމުންނެވެ. ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ހާރިޖީ ސިޔާސަތަކީ ”ޕްރޯ މޯލްޑިވްސް“ ސިޔާސަތު ކަމަށާއި، އެ ސިޔާސަތު ބައްޓަން ކުރައްވަނީ ދިވެހިރާއްޖެއަށް އެންމެ ފައިދާ ހުރި ގޮތަށް ކަމަށެވެ.
”އަޅުގަނޑުމެންނަކީ ހުރިހާ ގައުމެއްގެ ވެސް ރަހްމަތްތެރިން، އިޒްރޭލް ކަހަލަ ނޭއްގާނީ ގައުމެއް ފިޔަވާ.“ ޒަމީރު ވިދާޅުވިއެވެ.
މިނިސްޓަރު ވިދާޅުވީ ރައީސް މުއިއްޒުގެ ސަރުކާރަށް 08 މަސް ވެގެންދިޔައިރު، އެމަނިކުފާނުގެ ސަރުކާރުން އަމަލު ކުރައްވަމުން ގެންދަވަނީ ވައުދުފުޅާ އެއްގޮތަށް ކަމަށެވެ. އެގޮތުން ރާއްޖެ އަށް މިހާރު ކުރިމަތިވެފައިވާ ހާލަތުން އަރައިގަތުމަށް މަސައްކަތްތައް ކުރެވެމުންދަނީ ގައުމުތަކާ ގުޅިގެން ކަމަށް މިނިސްޓަރު ވިދާޅުވިއެވެ.
ޒަމީރުގެ ވާހަކައިގައި ރައީސް މުއިއްޒުގެ ޒައާމަތުގައި، ރާއްޖޭގެ ކުރިމަގު ފެންނަނީ ވަރަށް ވެސް އުޖާލާކޮށް ކަމުގައި ވިދާޅުވިއެވެ.
