ކެއްކުމުގެ އެންމެ މަޝްހޫރު އެއް ޝޯ ކަމަށްވާ ”މާސްޓާ ޝެފް“ ރާއްޖޭގައި ބޭއްވުމަށް މަސައްކަތް ކުރަމުން އަންނަ ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެއެެވެ.
މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން(އެމްއެމްޕީއާރްސީ) އިން އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރު ފައިސަލް ވިދާޅުވީ ރާއްޖޭގެ ބައެއް ލަގްޒަރީ ރިސޯޓްތަކުގައި 30،000 އަދި 35،000 ޑޮލަރުގެ މުސާ ލިބޭ ޝެފުން އެބަތިބި ކަމަށެވެ.
އަދި މިއީ ދިވެހިންނަށް ވެސް ކުރެވިދާނެ ކަމެއްކަން ފާހަގަކުރައްވައި، މިކަމަށް ދިވެހިން ޝައުގުވެރިކުރުވުމަށް މަސައްކަތް ކުރައްވާނެ ކަމަށް ވިދާޅުވިއެވެ.
އެގޮތުން ”މާސްޓަރ ޝެޕް“ ރާއްޖޭގައި ބޭއްވުމަށް ޕީއެސްއެމްއާއެކު ވަރަށް އަވަހަށް މަޝްވަރާ ކުރައްވާނެ ކަމަށް ފައިސަލް ވިދާޅުވިއެވެ.
އަދި މިހާރު ބައެއް ރިސޯޓްތަކުގެ ބޭފުޅުންނާ މަޝްވަރާކުރައްވާފައިވާ ކަމަށާއި އެހީތެރިކަން ދޭން އެބޭފުޅުން އެއްބަސްވެފައިވާ ކަމަށް ފައިސަލް ވަނީ ވިދާޅުވެފައެވެ.
ފައިސަލް ވިދާޅުވީ ”މާސްޓަރ ޝެޕް“ ފަދަ ޝޯއެއް ބާއްވައިފިނަމަ، ޒުވާނުންގެ ޝައުގުވެރިކަން މިކަމަށް އުފެއްދޭނެ ކަމަށެވެ. އަދި މަތީ މަގާމުތަކުގައި ބިދޭސީން މަސައްކަތް ކުރުމުގެ ބަދަލުގައި އެ މަގާމުތަކަށް ދިވެހިން އައްޔަންކުރުމަކީ ހާއްސަ އިސްކަމެއް ދެއްވައިގެން ކުރައްވަން ބޭނުންވެވަޑައިގަންނަވާ ކަމެއް ކަމަށް ވެސް ފައިސަލް ވިދާޅުވިއެވެ.
