ބަންގްލަދޭޝްގައި ގިނަ ދުވަހު ބޮޑުވަޒީރުކަން ކުރެއްވި ޝެއިހު ހަސީނާ، ގައުމަށް އެނބުރި ވަޑައިގެން، ޝަރީއަތާ ކުރިމަތިލުމަށް ތައްޔާރަށް ހުންނެވި ކަމަށް ހަސީނާގެ ސަޖީބު ވާޒިދު ވިދާޅުވެއްޖެއެވެ.
ވަޒީފާ ކޯޓާގެ މައްސަލައިގައި ބަންގްލަދޭޝްގައި ފެށި މުޒާހަރާތައް ހޫނުވެ، ހަސީނާ ވަނީ މަގާމުން އިސްތިއުފާ ދެއްވަވައި، ގައުމު ދޫކުރައްވައި، ފިއްލަވައިފައެވެ.
ބަންގްލަދޭޝްގައި ކުރަމުންދިޔަ މުޒަހަރާތަކުގައި 400އަށްވުރެ ގިނަ އާއްމުން މަރުވިއިރު، މިކަމާ ގުޅިގެން ހަސީނާއަށް ދައުވާ އުފުލައި، ހައްގު އަދަބު ދޭން ޖެހޭނެ ކަމަށް ބަންގްލަދޭޝްގެ ގިނަ ބަޔަކު ދަނީ ބުނަމުންނެވެ.
ރޮއިޓަރސްއާ ވާހަކަ ދައްކަވަމުން ހަސީނާގެ ދަރިކަލުން ސަޖީބު ވިދާޅުވީ، ހައްޔަރު ކޮށްފާނެތީ މަންމަ ޖެހިލުން ނުވާ ކަމަށާއި، ގައުމަށް ވަޑައިގަންނަވަން ހުންނެވީ ތައްޔާރަށް ކަމަށެވެ. ހަސީނާގެ ސަރުކާރުގެ އިސް މަގާމުތަކުގައި ތިއްބަވާ ފަރާތްތައް ކުށް ކުރުމަކީ، ހަސީނާގެ ކުށެއް ނޫން ކަމަށް ވެސް ސަޖީބު ވިދާޅުވިއެވެ.
ހަސީނާގެ ސަރުކާރު ވެއްޓުނީ 1971 ވަނަ އަހަރު ބަންގްލަދޭޝް އިން މިނިވަންކަމަށް ކުރި ހަނގުރާމައިގައި މަރުވި އަސްކަރިއްޔާގެ އާއިލާތަކަށް ސަރުކާރުގެ ވަޒީފާތަކުގެ ވަކި މިންވަރެއް ކަނޑައެޅުމާ ދެކޮޅަށް ފެށި މުޒާހަރާތަކުގައި ހިނގައިދިޔަ ހަމަނުޖެހުންތަކާ ގުޅިގެންނެވެ. އެ ސިލްސިލާ މުޒާހަރާތައް ފަސް ހަފްތާ އަށް ދިގު ދެމިގެން ދިޔައެވެ.
