ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިއަދު މާލެ ސިޓީ ކައުންސިލާ ބައްދަލުކުރައްވާ ގޮތަށް ހަމަޖެހިއްޖެއެވެ.
މައުލޫމާތު ލިބިފައިވާ ގޮތުގައި ރައީސް މުއިއްޒުގެ އެދިވަޑައިގަތުމަކަށް މާލޭ ސިޓީ ކައުންސިލާ ބައްދަލުކުރެއްވުމަށް، އެމަނިކުފާނު މިއަދު 11:00 ގައި މާލޭ ސިޓީ ކައުންސިލަށް ޒިޔާރަތް ކުރެއްވުމަށް ވަނީ ހަމަޖެހިފައެވެ.
ރައީސް މުއިއްޒު އަކީ މިހާތަނަށް، ކުރު މުއްދަތެއްގެ ތެރޭގައި، އެންމެ ގިނަ ކައުންސިލް އިދާރާއަށް ޒިޔާރަތް ކުރައްވަވައި، އެންމެ ގިނަ ކައުންސިލަރުންގެ އަޑު އެއްސެވި ރައީސްއެވެ.
މިގޮތުން އެމަނިކުފާނު މާލެ ސިޓީ ކައުންސިލާ ބައްދަލު ކުރައްވަނީ އެ ކައުންސިލުގެ ވެސް އަޑު އެއްސެވުމަށެވެ.
މާލެ ސިޓީ ކައުންސިލުގެ މޭޔަރުގެ މަގާމުގައި މިހާރު ހުންނެވީ، އިދިކޮޅު އެމްޑީޕީއަށް ނިސްބަތްވެވަޑައިގަންނަވާ އާދަމް އާޒިމެވެ. މާލޭގެ މޭޔަރުގެ ގޮނޑި ހުސްވީ މިދިޔަ އަހަރު ބޭއްވި ރިޔާސީ އިންތިހާބު ރައީީސް މުއިއްޒު ކާމިޔާބު ކުރެއްވުމުންނެވެ.
