އެމަނިކުފާނުގެ ސަރުކާރުން ރާއްޖޭގެ ޝަރުއީ ނިޒާމަށް އެއްވެސް ނުފޫޒެއް ނުފޯރުވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ، މާލެ ސިޓީ ކައުންސިލަށް މިއަދު ކުރެއްވި ޒިޔާރަތަށްފަހުގައި، ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ.
ރައީސް މުއިއްޒު ވިދާޅުވީ ޝަރުއީ ދާއިރާއަށް ނުފޫޒު ފޯރުވުން ފަދަ ކަމެއް ކުރާ ބޭފުޅަކު، ސަރުކާރުގެ މަގާމެއްގައި ހުރެއްޖެ ނަމަ، އެ ބޭފުޅަކު މަގާމުން ވެސް ވަކި ކުރައްވާނެ ކަމަށެވެ.
ޝަރުއީ ދާއިރާއަށް އެއްވެސް ނުފޫޒެއް ނުފޯރުވާނެކަމުގެ ޔަގީންކަން ރައީީސް ތަކުރާރުކޮށް ދެއްވިއިރު، ކުރީގެ ރައީސް ޔާމީން ވަނީ އެމަނިކުފާނުގެ ޝަރީއަތް ހައި ކޯޓުގައި ހިނގިއިރު ސަރުކާރުން ނުފޫޒު ފޯރުވި ކަމަށް ތުހުމަތު ކުރައްވާ، އެކަން އަންގައިދޭ އޯޑިއޯ ވެސް އެބަހުރި ކަމަށް ވިދާޅުވެފައެވެ. އަދި އެ އޯޑިއޯތައް ހާމަ ކުރައްވާނެ ކަމުގައި ވެސް ޔާމީން ވިދާޅުވިއެވެ.
ޔާމީން ވަނީ މި ސަރުކާރުގެ ވަޒީރަކު ހައި ކޯޓުގެ ބެންޗުގައި ހިމެނިވަޑައިގަންނަވާ ފަނޑިޔާރަކާ ތައިލެންޑްގެ ޕުކެޓްގައި ބައްދަލު ކުރައްވައިފައިވާ ކަމަށް ވިދާޅުވެފައެވެ.
ރައީީސް މުއިއްޒު 2023 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހު ވެރިކަމުގެ ހުވާ ކުރައްވައި، ދެއްވި ތަގުރީރުގައި ވެސް، ޝަރުއީ ނިޒާމަށް އެއްވެސް ނުފޫޒެއް ނުފޯރުވާނެކަމުގެ ޔަގީންކަން ރައްޔިތުންނަށް އެރުވިއެވެ.
