ފަލަސްތީނުގެ ޣައްޒާގެ ސްކޫލަކަށް ހަމަލާދީ އެތައް ބަޔަކު ޝަހީދުކޮށްލުން، ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކުށްވެރި ކުރައްވައިފިއެވެ.
އެކްސްގައި މިއަދު ކުރެއްވި ޕޯސްޓެއްގައި ރައީސް މުއިއްޒު ވަނީ ޔަހޫދީންގެ އެ އަމަލު ކުށްވެރިކުރައްވައި އިޒުރޭލު ޖަވާބުދާރީ ކުރުވުމަށް ގޮވައިލައްވައިފައެވެ.
ރައީސް ކުރެއްވި ޕޯސްޓުގައި ވިދާޅުވީ ޣައްޒާގެ ތަބީއިން ސްކޫލުގައި ހިމާޔަތް ހޯދައިގެން ތިބި އެތައް ކުޑަކުދިންނާއި، އުމުރުން ދުވަސްވީ މީހުންނާއި، އެތައް އަންހެނުންނެއް ޒަހަމްކޮށްލައި ޝަހީދުކޮށްލުމަކީ ބިރުވެރި މަންޒަރެއް ކަމަށެވެ.
އެމަނިކުފާނު ވިދާޅުވީ އިޒުރޭލުން މިދިޔަ އަހަރުގެ އޮކްޓޫބަރު މަހުން ފެށިގެން ފަލަސްތީންގެ ޣައްޒާގައި ކުރިއަށް ގެންދާ ގަތުލުއާންމު ހުއްޓާލުމަށް އިޒްރޭލުން އެއްވެސް މަސައްކަތެއް ކުރަމުން ނުދާ ކަމަށެވެ.
އެހެންވެ ރައީސް ވަނީ އިޒުރޭލުގެ ލާއިންސާނީ އަމަލުތައް ހަރުކަށި އިބާރާތުން ކުށްވެރި ކުރައްވާ، އިޒުރޭލުގެ އަމަލުތަކަކީ ބައިނަލްއަގްވާމީ އިންސާނީ ގާނޫނާ ހިލާފު އަމަލުތަކެއް ކަމަށް ވިދާޅުވެފައެވެ.
އަދި މިކަމަށް އިޒްރޭލާ ދެކޮޅަށް ވަގުތުން ވަގުތަށް ފިޔަވަޅު އަޅަންޖެހޭ ކަމަށްވެސް ވިދާޅުވިއެވެ.
އިޒްރޭލުން ދިން ހަމަލާއާ ގުޅިގެން ރާއްޖޭގެ ފޮރިން މިނިސްޓްރީން ވެސް ވަނީ އިޒްރޭލުން ކުށްވެރިކޮށް ބަޔާނެއް ނެރެފައެވެ.
