އިންޑިއާގެ ވެރިކަންކުރާ ޕާޓީ،ބާރަތިޔާ ޖަނަތާ ޕާޓީ(ބީޖޭޕީ)ގެ ތަރުޖަމާނު ކީރިތި ރަސޫލާ (ސ.އ.ވ)އަށާއި ކީރިތި ގުރުއާނަށް ފުރައްސާރަކުރި މައްސަލަ ދިވެހި ސަރުކާރުން ކުށްވެރި ކުރުމަށް ގޮވާލައި، ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިފިއެވެ.
މިމައްސަލަ ރައްޔިތުންގެ މަޖިލީހަށް ހުށަހަޅާފައިވަނީ މަޑުއްވަރީ ދާއިރާގެ މެމްބަރު އާދަމް ޝަރީފް އުމަރެވެ.
މި ކުއްލި މައްސަލަ މަޖިލީހަށް ބަލައިގަތުމަށް ފެންނަ ކަމަށް ވޯޓު ދެއްވީ 10 މެމްބަރުންނެވެ. އަދި ނުފެންނަ ކަމަށް 33 މެމްބަރުން ވޯޓު ދެއްވާފައިވެއެވެ.
މި މައްސަލައިގައި ވަނީ އިންޑިއާގެ ވެރިކަންކުރާ ޕާޓީ، ބީޖޭޕީގެ ތަރުޖަމާނަކު ރަސޫލާއާ ގުރުއާނަށް ފުރައްސާރަ ކުރުމުން އެކަމުގައި އެހެން ގައުމުތަކުން ނުރުހުން ފާޅުކޮށް އިހުތިޖާޖުކުރަމުން އަންނައިރު، ދިވެހި ސަރުކާރުން އެއްވެސް ފިޔަވަޅެއް އަޅާފައި ނުވާތީ އެކަން ކުށްވެރިކޮށް އެކަން ސަރުކާރުގެ ސަމާލުކަމަށް ގެންނަ ކަމަށެވެ.
އަދި އިންޑިއާގެ ވެރިކަންކުރާ ޕާޓީ، ބީޖޭޕީގެ ތަރުޖަމާން ދައްކާފައިވާ ވާހަކަތައް ކުށްވެރިކޮށް އެކަން ކުށްވެރިކުރުމަށް ސަރުކާރަށް ގޮވާލާ ކަމަށްވެސް މައްސަލައިގައި ބުނެފައިވެއެވެ.
