އަށްޑިހަތިން ޓީމާއެކު ރާއްޖޭގެ ހަތަރު ސިޓީގައި ބާއްވާ އުރީދޫ މަސްރޭސް ފަށަން ތައްޔާރު ވެއްޖެއެވެ.
”އުރީދޫ މަސް ރޭސް“ އަކީ ރާއްޖޭގައި ބާއްވާ އެންމެ ފޯރި ގަދަ، އަދި އެންމެ ބޮޑު މަސް ރޭހެވެ.
މި އަހަރުގެ މަސް ރޭހުގެ ރަޖިސްޓްރޭޝަން މަރުހަލާ ނިންމާލައިފައިވާއިރު، ރާއްޖޭގެ އެކި ކަންކޮޅުތަކުގައި ދިރިއުޅޭ މަސްވެރިކަމަށް ޝައުގުވެރިވާ ފަރާތްތަކުގެ ފަރާތުން ހީވެސް ނުކުރާ ވަރުގެ ތަރުހީބެއް ލިބިފައިވާ ކަމަށް އުރީދޫން ބުނެއެވެ.
އުރީދޫން ބުނީ، އެ ކުންފުންޏަށް 18 އަހަރު ފުރުން ފާހަގަ ކުރުމުގެ ގޮތުން ބާއްވާ ހަރަކާތްތަކުގެ ތެރެއިން، މަސްރޭސް ބާއްވަނީ އެހެން އަހަރުތަކަށް ވުރެ ފޯރިގަދަކޮށް އަދި ކުލަ ގަދަކޮށް ކަމަށެވެ.
ކޮންމެ ސިޓީއެއްގައި ވެސް މުބާރާތް ފެށުމަށް ހަމަޖެހިފައިވާ ތާރީހުތައް:
- މާލެ: އޮގަސްޓު 4
- ކުޅުދުއްފުށި: އޮގަސްޓު 11
- އައްޑޫ: އޮގަސްޓު 18
- ފުވައްމުލަކު: އޮގަސްޓު 25
އުރީދޫއިން ބުނީ މާލެއިން 34 ޓީމު ބައިވެރިވާއިރު ކުޅުދުއްފުށި ސިޓީން 23 ޓީމާއި އައްޑޫ ސިޓީގެ 13 ޓީމަކާއި ފުވައްމުލައް ސިޓީގެ 13 ޓީމު ބައިވެރިވާ ކަމަށެވެ.
އަދި ކޮންމެ ޓީމެއްވެސް އެ ޓީމެއްގެ ސިޓީގައި ޗެމްޕިއަންކަން ހޯދުމަށް ވާދަކުރާއިރު މުބާރާތުގެ ފޯރި އާއި ވާދަވެރިކަން އެހެން އަހަރުތަކަށް ވުރެ ވަރުގަދަވެގެންދާނެ ކަމަށް އުރީދޫއިން ބުނެއެވެ.
އުރީދޫ މަސް ރޭސް ރެކޯޑް މުގުރާލާ މިދިޔަ އަހަރު ޗެމްޕިއަންކަން ހޯދި ސްޓެލްކޯ ކަންބަލުން ޓީމުން މި އަހަރުވެސް ވާދަކުރާކަން އެކުންފުނިން ވަނީ އުފަލާއެކު ފާހަގަކޮށްފައެވެ.
ޖުމްލަ 160،000 ރުފިޔާގެ އިނާމު ދިނުމަށް ހަމަޖެހިފައިވާއިރު، އޭގެ ތެރޭއިން ކޮންމެ ސިޓީއަކުން ވަނަތައް ހޮވަން ވަނީ ނިންމާފައެވެ.
އެގޮތުން އެއްވަނަ ޓީމަށް 25،000 ރުފިޔާ، ދެ ވަނަ ޓީމަށް 10،000 ރުފިޔާ، ތިން ވަނަ ޓީމަށް 5000 ރުފިޔާ، އެންމެ މޮޅު ފިރިހެން ކެޔޮޅަށް 1000 ރުފިޔާ، އެންމެ މޮޅު އަންހެން ކެޔޮޅަށް 1000 ރުފިޔާ ދިނުމަށް ހަމަޖެހިފައިވެއެވެ.
އުރީދޫއިން ވަނީ އުރީދޫ މަސްރޭހަށް ރަޖިސްޓްރީކުރި ހުރިހާ ޓީމަކަށް ޝުކުރު އަދާކޮށް، ލިބުނު ބޮޑު އެއްބާރުލުމަކީ މި ހަރަކާތުގެ ސަބަބުން މަސްވެރިކަމަށް ލޯބި ކުރާ ފަރާތްތަކުގެ ތެރޭގައި އުފެދުނު އުފާވެރިކަމާއި ޝައުގުވެރިކަން ދައްކުވައިދޭ ކަމެއްގެ ގޮތުގައި ފާހަގަކޮށްފައެވެ.
