ރައީސް އިބްރާހީމް މުހައްމަދު ސޯލިހުގެ ވެރިކަމުގެ ފުރަތަމަ 100 ދުވަހުގެ ތެރޭގައި އަތުރައިލެއްވީ ވައްކަމުގެ ނެޓްވޯކެއް ކަމަށް މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ(އިންތި) ވިދާޅުވެއްޖެއެވެ.
އިންތި މިގޮތަށް ވިދާޅުވީ، އޭނާ ކުރެއްވި ޓްވީޓެއްގައެވެ.
އިންތި ވިދާޅުވީ ފުރަތަމަ 100 ދުވަހުގެ ތެރޭގައި ކަރަންޓްގެ އަގު ކުޑަ ކުރާނެ ކަމަށް ރައީސް ސޯލިހު ވަޢުދުވި ނަމަވެސް އޭގެ ބަދަލުގައި ފުރަތަމަ 100 ދުވަހުގެ ތެރޭގައި އަތުރާލީ ވައްކަމުގެ ނެޓްވޯކެއް ކަމަށެވެ.

ޑިމޮކްރެޓްސްއަށް ނިސްބަތްވެވަޑައިގަންނަވާ އިންތި، ރައީސް ސޯލިހު އަށް ވަރަށް ބޮޑަށް ފާޑުވިދާޅުވަމުން ގެންދަވާއިރު، އޭނާ ރިޔާސީ އިންތިހާބުގެ ކުރިން ވަނީ، އިންތިހާބުގެ ނަތީޖާ ކޮންމެ ގޮތަކަށް ނުކުތަސް، ޑިމޮކްރެޓްސް އިން، ރައީސް ސޯލިހުގެ ފަހަތަށް ނާރާނެ ކަމަށް ވިދާޅުވެފައެވެ.