ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާ ކުރުމަށްޓަކައި ދިވެހިރާއްޖޭގެ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ގެންގުޅުއްވާ ސިޔާސަތުގެ ދަށުން އެންމެ ފުރަތަމަ ހަމަމަގަށް އަޅުވަން ފެށި ކުންފުނީގެ ގޮތުގައި އެމަނިކުފާނު މިފްކޯގެ ނަން ރޭގެ މިނިވަންދުވަހުގެ ހާއްސަ ޖަލްސާގައި ވާހަކަފުޅު ދައްކަވަމުން ފާހަގަކުރެއްވުމަކީ، އެ ކުންފުންޏަށް ލިބުނު ވަަރަށް ބޮޑު ފަހުރެއް ކަމަށް އެ ކުންފުނިން ބުނެފިއެވެ.
މިފްކޯ އިން މިއަދު ނެރުނު ބަޔާނެއްގައި ބުނީ، އެކަމަށްޓަކައި ކުންފުނީގެ ބޯޑާއި، މެނޭޖުމެންޓުގެ އިތުރުން، ހީވާގި މުވައްޒަފުންގެ ފަރާތުން ރައީސް މުއިއްޒުއަށް އިހުލާސްތެރިކަމާއެކު ޝުކުރު ދަންނަވާ ކަމަށެވެ.
”ކުންފުނީގެ ހިންގުން ހަރުދަނާކުރުމާއި، އިސްރާފު ކުޑަކުރުމަށް ރައީސް މުއިއްޒު ދެއްވާ އަހައްމިޔަތުކަން މި ކުންފުނިން އުފަލާއެކު ފާހަގަކުރަމެވެ. ހާއްސަކޮށް ރާއްޖޭގެ މަސްވެރިކަމުގެ ސިނާއަތުގެ ތެރޭގައި މަސައްކަތްކުރާ އެއްވެސް ފަރާތަކާ ގުޅުމެއް ނެތް، އެހެން ނަމަވެސް ދުނިޔޭގެ ފެންވަރުގެ ކުންފުނިތައް ހިންގަވާފައިހުރި، ކަމުގެ ތަޖުރިބާކާރު ބޭފުޅަކާ މިފްކޯގެ ހިންގެވުން ހަވާލުކުރައްވަން ރައީސް މުއިއްޒު ނިންމެވުމަކީ، މި ކުންފުނިން ދެކޭގޮތުގައި ވަރަށް ހިތްވަރުފުޅުގަދަ ނިންމެވުމެއް ކަމުގައި ދަންނަވަމެވެ.“ ބަޔާނުގައިވެއެވެ.
މިފްކޯ އިން ބުނީ، ސިނާއަތުގެ ތެރޭގައި ހުރި ނޭދެވޭ ކަންކަން ހުއްޓުމަކަށް ގެނައުމަށް ރައީީސް މުއިއްޒު ދެއްވާ ހާއްސަ އަހައްމިއްޔަތުކަން ރަމްޒުކޮށްދޭ ކަމެއް ކަމާއި މަދު އެއްވެސް ޝައްކެއް ނެތް ކަމަށެވެ.
ރައީސް ވިދާޅުވި ފަދައިން، އެސްއޯއީތަކުގެ ތެރެއިން އެންމެ ބޮޑު ރިފޯމް މަސައްކަތެއް މިއަދާ ހަމައަށް އައިއިރު، މިފްކޯއަށް ކުރެވުމުގެ ޖާގަ ތަނަވަސްވެގެން ދިޔައީ އެމަނިކުފާނުގެ ހަރުދަނާ ސިޔާސަތުގެ ސަބަބުން ކަމުގައި ދެކޭ ކަމަށް މިފްކޯ އިން ވަނީ ބުނެފައެވެ.
އެގޮތުން ކުންފުނި ހަމަ މަގަށް އެޅުވުމަށްޓަކައި މިހާތަނަށް ގިނަ މަސައްކަތްތަކެއް ކުރެވިފައިވާއިރު، ކުންފުނީގެ އެފިޝިންޓްކޮށް ހިންގުމަށް އަދިވެސް ވަނީ ގިނަ މަސައްކަތްތަކެއް ކުރަން ޖެހިފައިކަން ބަޔާނުގައި ފާހަގަކޮށްފައިވެއެވެ.
އެހެން ކަމުން ސަރުކާރުން ފެއްޓެވި އިސްލާހީ މަސައްކަތުގެ ތެރެއިން ކުންފުނިތަކުގެ ހިންގުން ހަރުދަނާކުރުމަށް ކުރެވޭ މަސައްކަތުގައި މި ކުންފުނި އަބަދުވެސް ދެމިއޮންނާނެ ކަމުގެ ޔަގީންކަން ރައީސަށާއި، ފިޝަރީޒް މިނިސްޓަރު އަހުމަދު ޝިޔާމަށާއި، ސިނާއަތުގެ ހިއްސާދާރުންނަށާއި ރާއްޖޭގެ އެންމެހާ ލޮބުވެތި ރައްޔިތުންނަށް އަރުވާ ކަމަށް މިފްކޯ އިން ވަނީ ބުނެފައެވެ.
މިނިވަން ދުވަހުގެ ރަސްމީ ޖަލްސާގައި ރައީީީސް މުއިއްޒު ރޭ ވިދާޅުވީ، ކުންފުނިތައް ރިފޯމް ކުރުމަށް މަސައްކަތް ކުރަމުން އަންނައިރު، އެންމެ ބޮޑު ރިފޯމް މަސައްކަތެއް މިއަދާ ހަމައަށް އައިއިރު، ކުރެވުނީ މިފްކޯގައި ކަމަށް ވިދާޅުވިއެވެ.
”މިފްކޯ ވަކިން ހިންގާ ކުންފުންޏަކަށް ބަދަލުވުމުގެ އިތުރަށް، ވަރަށް ގިނަ މަސައްކަތް ކުރެވިއްޖެ.“ ރައީސް ވިދާޅުވިއެވެ.
