ރައީސް އިބްރާހީމް މުހައްމަދު ސޯލިހުގެ ސަރުކާރުން އައްޑޫ ސިޓީގެ ރައްޔިތުންނަށް ވެފައިވާ ވައުދުގެ ޒައްރެއްގެ މިންވަރުވެސް ނުފުއްދާ ކަމަށާއި، 2023 ވަނަ އަހަރުގެ ބަޖެޓުންވެސް އައްޑޫގެ ރައްޔިތުންގެ ހުވަފެންތަކުގައި ކުލަ ޖެހެން ނެތް ކަަމަށް ޕީޕީއެމްގެ ނައިބު ރައީސް އަހުމަދު ޝިޔާމް ވިދާޅުވެއްޖެއެވެ.
ޕްރޮގްރެސިވް ޕާޓީ އޮފް މޯލްޑިވްސް(ޕީޕީއެމް)އިން ރޭ ބޭއްވެވި ޖަގަހަ ޖަލްސާގައި ދެއްކެވި ވާހަކައިގައި ނައިފަރު ދާއިރާގެ މެމްބަރު ޝިޔާމް ވިދާޅުވީ އިދިކޮޅު ލީޑަރު، ރައީސް ޔާމީނާއެކުގައި، ޕީޕީއެމް-ޕީއެންސީގެ ވަފްދެއް އައްޑޫ ސިޓީއަށް ދަތުރު ކުރުމުން، އެ ސިޓީގެ ރައްޔިތުން މިއަދު މާޔޫސްވެފައި ތިބި މިންވަރު ފެނުނު ކަމަށެވެ.
ޝިޔާމް ވިދާޅުވި ގޮތުގައި ރައްޔިތުންގެ މަޖިލީހުގައި އައްޑޫ ސިޓީ ތަމްސީލު ކުރައްވަން، މިއަދު ތިއްބެވީ ހަމައެކަނި އެމްޑީޕީގެ މެމްބަރުންނެވެ.
”އާދޭސް އެބަ ކުރޭ، އޭގެ ތެރެއިން ބައެއް މެމްބަރުން، އައްޑޫ ސިޓީއަށް ވީ ވައުދު ފުއްދަވަން. އަޅުގަނޑުމެންވެސް މި އާދޭސް އެބަ ދަންނަވަން. އެކަމަކު، މިއަހަރު، އެންމެ ފަހު އަހަރު، 2023. ދެން މި އޮތީ އަށެއްކަ މަސް ދުވަސް، އެންމެ ފަހު އަހަރުގެ ބަޖެޓުގައިވެސް އައްޑޫ ސިޓީ ރައްޔިތުންގެ އެ އުއްމީދުތަކުގަ ކުލަ ޖެހޭނެ ގޮތެއް ނުވި.“ ޝިޔާމް ވިދާޅުވިއެވެ.
ޝިޔާމް ވިދާޅުވީ އައްޑޫ ސިޓީގެ އިތުރުން، އެހެނިހެން ދާއިރާތަކުގެ މަޝްރޫއުތައްވެސް ހިންގާނެ ފައިސާ ބަޖެޓުގައި ނެތް ކަމަށެވެ.
މީގެ އިތުރުން ޝިޔާމްގެ ވާހަކައިގައި ބަޖެޓު ކޮމިޓީ ކުރިއަށް ގެންދިޔައީ ވަގު ވަގަށް ކަމަށާއި، އިދިކޮޅު ތަމްސީލު ކުރައްވާ މެމްބަރުންނަށް، ކޮމެޓީގައި ބައިވެރިވެ، ކަންބޮޑުވުންތައް ހިއްސާ ކުރުމުގެ ފުރުސަތު ނުލިބޭކަން ފާހަގަކުރެއްވިއެވެ.
”އިއްޔެ ބަޖެޓު ފާސްކުރަން، އެއީ ހުކުރު ދުވަސް. ހުކުރު ދުވަހު، ހުކުރު ވަގުތު ބަޖެޓު ފާސްކުރަން އުޅުނު ގޮތުން އަޅުގަނޑުމެންނަށް އެނގިއްޖެ، މިއީ ހަތަރެސްކަން ހަމަވެފަ އޮތް، ހަތަރު އުދަރެސް ފެނުޖެހިފަ، ކޮންމެ ކަމެއް، ކޮންމެ ގޮތެއް ވަރިހަމަވެފައިއޮތް ސަރުކާރެއްކަން.“ ޝިޔާމް ވިދާޅުވިއެވެ.
ޝިޔާމް ވިދާޅުވީ މި ދެކެވެނީ ދިވެހިރާއްޖޭގެ ބަޖެޓުގެ ވާހަކަ ކަމަށާއި، ބަޖެޓު ކޮމިޓީތައް ފަދަ ކޮމިޓީތައް އާންމު ގޮތެއްގައި ކުރިއަށްދާނީ ވަރަށް ބޮޑަށް ރޭވިގެން، ޒިންމާދާރުކަމާއެކުގައި ކަމަށެވެ.
