ނުރައްކާވާ ގޮތަށް ތަކުރާރުކޮށް ދުއްވާ މީހުންގެ ވަނަވަރު އާންމު ކުރާނެ ކަމަށް ފުލުހުން ބުނެފިއެވެ.
މިފަދަ މައްސަލަތައް އާންމުވެ، މީހުންގެ ފުރާނަ ގެއްލުމުގެ ހާދިސާތައް ވެސް ތަކުރާރުވަމުންދާތީ ފުލުހުން ވަނީ ނުކުރައްކާތެރިކޮށް ތަކުރާރުކޮށް ދުއްވާ މީހުންނަށް ހަރުކަށި ފިޔަވަޅު އަޅާނެކަމުގެ އިންޒާރު މިދިޔަ ހަފުތާގައި ވެސް ދީފައިވެ އެވެ.
މިކަމާ ގުޅޭ ގޮތުން މިއަދު ފުލުހުން ނެރުނު ބަޔާނެއްގައި ބުނީ އެ ކުށް ތަކުރާރުކުރާ މީހުންގެ ވަނަވަރު ދެން އާންމު ކުރާނެ ކަމަށެވެ.
އަދި އެފަދަ އަމަލުތަކާ ގުޅިގެން އާންމުން ހިއްސާކުރާ ފޮޓޯ އާއި ވީޑިއޯތަކުގެ ސައްހަކަން ކަށަވަރު ކުރުމަށް ފަހު ގާނޫނީ ގޮތުން އަޅަން ޖެހޭ ފިޔަވަޅު ވެސް އަޅާނެ ކަމަށް ފުލުހުން ބުންޏެވެ.
މި ކަންކަން ތަކުރާރު ކުރާ މީހުންނަށް ފިޔަވަޅު އަޅާނެ:
* ބިރުވެރިކޮށް ޒިގްޒެގްކޮށް ދުއްވާ މީހުން
* ވެހިކަލަށް ބަދަލުތައް ގެނެސް އަޑުގަދަކޮށް ދުއްވާ މީހުން
* ހަރު ބިންމަތީގައި ގާނަމުން ދުއްވާ މީހުން
* ދުވެލި މަތަތަކަށް މަޑުނުކޮށް ބާރަށް ދުއްވާ މީހުން
* ހުއްދަ ނެތި ރޭސް ޖެހުމާއި ހުނަރު ދައްކާ މީހުން
* ނުރައްކާތެރިކޮށް އޯވަޓޭކް ކުރާ މީހުން
* މަސްތުވެގެން ދުއްވާ މީހުން
* ފުލުހުން އެންގުމުން މަޑުނުކުރާ މީހުން
* ފުލުހުން މަޑުކުރަން އެންގުމުން ފިލަން މަސައްކަތްކުރާ މީހުން
ބަޔާނުގައި ބުނީ ނުރައްކާތެރިކޮށް ދުއްވާ ވެހިކަލްތައް ހޯދައި، އެ ދުއްވީ މީހާގެ އިތުރުން އޭގެ ވެރި ފަރާތާ މެދު ވެސް ފިޔަވަޅު އަޅާނެ ކަމަށެވެ.
އަދި ވެހިކަލް 30 ދުވަހުގެ މުއްދަތަށް ފުލުހުންގެ ބެލުމުގެ ދަށަށް ގެންދިއުމަށް ފަހު، ކަނޑައަޅާފައިވާ މުއްދަތުގެ ތެރޭގައި ހަވާލުނުވެއްޖެ ނަމަ ނައްތައިލާނެ ކަމަށް ވެސް ފުލުހުން ބުންޏެވެ.
ބަޔާނުގައި ނުރައްކާތެރިކޮށް ދުއްވާ މައްސަލަތަކުގައި ސަރުކާރުގެ މުއައްސަސާތަކާއި ކުންފުނިތަކުގެ މުވައްޒަފުން ޝާމިލުވާކަން ފާހަގަ ކުރެވިފައިވާ ކަމަށެވެ.
އެހެންވެ އެފަދަ ފަރާތްތަކާ މެދު އެޅެން ހުރި ފިޔަވަޅުތަައް އެޅުމަށް މުއައްސަސާ ހިއްސާ ކުރަމުން އަންނަ ކަމަށް ވެސް ފުލުހުން ބުންޏެވެ.
ފުލުހުން ޓްރެފިކް ގާނޫނުގެ ދަށުން ޖޫރިމަނާ ކުރުމުގެ އިތުރަށް އިތުރު އިންޒާރަކާ ނުލައި އެފަދަ އަމަލު ތަކުރާރުކުރާ މީހުންގެ މައްޗަށް ޖިނާއީ ތަހުގީގު ވެސް ހިންގާނެ ކަމަށެވެ.
