ކުރިއަށް އޮތް ރަމަޟާން މަަހަށް މާލޭގެ މިސްކިތްތައް މަރާމާތު ކުރުމަށް ޓެލެތޯނަކާއެކުގައި، ފަންޑް ރެއިޒިން ހަރަކާތްތަކެއް ކުރިއަށް ގެންދިޔުމަށް މާލެ ސިޓީ ކައުންސިލުން ފާސްކޮށްފިއެވެ.
މިގޮތަށް ފާސްކުރީ މިއަދު ބޭއްވި، މާލެ ސިޓީ ކައުންސިލުގެ ހަތަރު ވަނަ ދައުރުގެ، 77 ވަނަ ރަސްމީ އާންމު ޖަލްސާގައެވެ.
މި ހަރަކާތްތައް ކުރިއަށް ގެންދިޔުމަށް ސިޓީ ކައުންސިލުން މިއަދު ފާސްކުރި ތާރީހަކީ، އަންނަ ޑިސެމްބަރުމަހުގެ 16ވާ ހުކުރު ދުވަހެވެ.
މިކަމާ ގުޅޭގޮތުން މި ބައްދަލުކުރެއްވުމުގައި ކައުންސިލަރުން މަޝްވަރާ ކުރެއްވިއިރު، ހުޅުމާލޭގެ ކައުންސިލަރު އިބްރާހީމް ޝުޖާއު ވިދާޅުވީ މިސްކިތްތަކުގެ މަަރާމާތަށް ފަންޑު ރައިޒް ކުރުމަކީ ތާއީދު ކުރައްވާ ކަމެއް ކަމަށާއި، މިހާރުވެސް މިކަމަށް ކައުންސިލުން ބޮޑު ހޭދައެއް ކުރަމުން އަންނަ ކަމަށެވެ.
މި ހަރަކާތް ކުރިއަށް ގެންދިޔުމަށް ސިޓީ ކައުންސިލުން ކުރިން ރާވާފައި އޮތީ، މިދިޔަ ރޯދަ މަހުގައެވެ. ނަމަވެސް އޭރު އެކަން ކުރިއަށް ނުގެންދެވުނީ ކޮވިޑް-19ގެ ބަލިމަޑުކަމުގެ ސަބަބުންނެވެ.
ސިޓީ ކައުންސިލުން ނިންމީ މިސްކިތްތަައް މަރާމާތު ކުރުމަށް ޓީވީން ގެނެސްދޭނެ ޓެލެތޯނެއް ބާއްވައި ސަލްޓަން ޕާކު ސަރަހައްދުގައި ސްޓޯލްތަކެއް ހަދައި، މަރާމާތު ކުރަން ބޭނުންވާ މިސްކިތްތަކުގެ ފޮޓޯއާއި މައުލޫމާތު، އާއްމުންނަށް ފެންނާނެހެން ބަހައްޓައިގެން ފަންޑް ރެއިޒިން ހަރަކާތް ކުރިއަށް ގެންދިޔުމަށެވެ.
މިގޮތުން މި ހަރަކާތުގެ ތެރެއިން، މަރާމާތު ކުރަން ބޭނުންވާ މިސްކިތްތަކުގެ މައުލޫމާތު، ވަރަށް ތަފްސީލުކޮށް އާއްމުންނާ ހިއްސާ ކުރުމަށް ވަނީ ހަމަޖެހިފައެވެ.
މިއަދުގެ ބައްދަލުކުރެއްވުމުގައި މާލެ ސިޓީގެ މޭޔަރު ޑރ.މުހައްމަދު މުއިއްޒު ވިދާޅުވީ މި ހަރަކާތުގެ ކުރިންވެސް، މިސްކިތްތައް މަރާމާތު ކުރުމުގެ މަސައްކަތަށް ފައިސާ ހަދިޔާ ކުރުމަށް ފަސޭހަ ފުރުސަތެއް އާއްމުންނަށް މިހާރުވެސް ހުޅުވިފައިވާނެ ކަމަށެވެ.
އާއްމުންގެ އެހީގައި އެކި ގޮތްގޮތުން ކުރިންވެސް ތިން މިލިއަން ރުފިޔާ ލިބިފައިވާކަން ފާހަގަކުރައްވައި، ފަންޑް ރެއިޒިން ހަރަކާތް ބާއްވަން ނިންމީ އާއްމުންގެ އެހީތެރިކަމަށް ހުޅުވާލުމަކީ މީގެ ކުރިން ކުރި ތަޖުރިބާއަށް ބަލައި، ރަނގަޅު ކަމެއް ކަމުގައި ފެނުން ކަަމަށްވެސް މޭޔަރު ވިދާޅުވިއެވެ.
ރަމަޟާން މަސް ބައްދަލުކުރާނީ މި އަންނަ އަހަރުގެ މާޗު މަހުގެތެރޭގައެވެ. މިސްކިތްތަކުގެ މަރާމާތަށް ސިޓީ ކައުންސިލުން ހާއްސަ އިސްކަމެއް ދޭއިރު، މާލޭގައި މަރާމާތު ކުރަން ޖެހޭ 40އަށްވުރެ ގިނަ މިސްކިތް އެބަހުއްޓެވެ.
މުއިއްޒު ވިދާޅުވީ އަމާޒަކީ ވީހާވެސް ގިނަ ރަައްޔިތުންނަށް ބައިވެރިވެވޭ ގޮތަށް ހަރަކާތް ކުރިއަށް ގެންދިޔުން ކަމަށެވެ.
