ކ.ގުޅިފަޅު އެކޮމަޑޭޝަން ބްލޮކެއްގައި ހިނގާދިޔަ ހާދިސާއަށްފަހު ގެއްލުނު މީހާ ހޯދުމަށް ކުރި މަސައްކަތް ނާކާމިޔާބު ވެފައިވާ ކަމަށް އެފްކޮންސްއިން ބުނެފިއެވެ.
ގެއްލުނު މީހާ ހޯދުމުގެ ގޮތުން، އެކޮމަޑޭޝަން ބްލޮކު ބަލާފައިވާއިރު އެތަނުން އެއްވެސް އިންސާނެެއްގެ ހަށިގަނޑު ފެނިފައެއް ނުވެއެވެ.
މި ހާދިސާގައި 78 މީހަކަށް އެކި ވަރުގެ އަނިޔާ ވެގެން ހޮސްޕިޓަލަށް ގެންދިޔަ އިރު އޭގެ ތެރެއިން 32 މީހަކު އެޑްމިޓުކޮށް އަންނަނީ ފަރުވާ ދެމުންނެވެ. އަދި ކުދި އަނިޔާތައް ލިބުނު 24 މީހުންގެ ތެރެއިން ހަތަރު މީހަކު އޮޕަރޭޝަންކޮށްފައިވާއިރު، ބާކީ ތިބި މީހުން ހޮސްޕިޓަލުން ދޫކޮށްލާފައިވާ ކަމަށް އެފްކޮންސް އިން މައުލޫމާތުދެއެވެ.
އެފްކޮންސް އިން ބުނީ އަލިފާނުގައި ހާލުގައި ޖެހުނު މީހުންނަށް އެހީތެރިކަން ފޯރުކޮށްދެމުން އަންނަ ކަމަށެވެ. އަދި މުވައްޒަފުންނަށް ދޭންޖެހޭ މުސާރަ ނުދީ ނުހުންނާނެ ކަމަށާއި ހުރިހާ އުޖޫރައެއް ވަގުތުން ދެމުންދާ ކަމަށްވެސް ބުނެފައިވެއެވެ.
