ތިލަފުށިން ވިއްކާ ބިން އަނބުރާ އަތުލުމަށް ދިވެހި ރައްޔިތުން ނުކުންނަން ޖެހޭ ކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހީމް ރަޝީދު(ބޮންޑެ) ވިދާޅުވެއްޖެއެވެ.
ބޮންޑެ މިހެން ވިދާޅުވެފައިވަނީ ސިނާއީ ބޭނުމަށް ބިން ދޫކުރަން ތިލަފުށިން އަލަށް ހިއްކާ ސަރަހައްދުގެ %90 ދިވެހި ކުންފުނިތަކަށް ހާއްސަކޮށް، ކުލި ކޮންޓްރޯލް ކުރެވޭ އުސޫލުތަކުގެ ތެރެއިން ދޫކުރަން ނިންމާފައިވާ ކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗުޑީސީ)އިން ބުނުމާ ގުޅިގެންނެވެ.
ގިނަ ބަޔަކު ދެކޮޅު ހަދަމުން ދަނިކޮށް ސިނާއީ ބޭނުމަށް ތިލަފުށިން 50 ބިމެއް ވިއްކަން އެޗުޑީސީއިން ރޭ ވަނީ އާންމުކޮށްފައެވެ.
ބޮންޑެ ވިދާޅުވީ ދިވެހީންނަށް ތިލަފުށިން ލިބެން ޖެހޭނީ 90 އިންސައްތައެއް ނޫން ކަމަށާއި، 100 އިންސައްތަ ކަަމަށެވެ.
އެޗްޑީސީން ބުނަނީ މި މަޝްރޫއުގެ މަގްސަދަކީ ސިނާއީ މަސައްކަތްތަކަށް ހުރި ދަތިތަކަށް ބޮޑު ލުޔެއް ހޯދުމާއި ދިވެހި ވިޔަފާރިތަކަށް ހުރި ފުރުސަތުތައް އިތުރުކުރުން ކަމަށެވެ.
މި މަޝްރޫއުގެ ސަބަބުން މުދަލުގެ އަގު ހެޔޮވެ، ދިވެހިންނަށް ލިބޭ ހިދުމަތްތަކުގެ ފެންވަރު ރަނގަޅުވާނެ ކަމަށްވެސް އެ ކުންފުނިން ބުނެއެވެ.
