ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައެއްގައި ފުލުހުން ހޯދަން އިއުލާނު ކުރިތާ މަސް ދުވަސް ފަހުން އަމިއްލައަށް ފުލުހުންނާއި ހަވާލުވި ސ. މަރަދޫފޭދޫ / ރަށްދެބައިގެ، އިބްރާހީމް ފައިހް ނިޒާމްގެ ޝަރީއަތް ނިމެންދެން ބަންދުގައި ބެހެއްޓުމަށް ކުރިމިނަލް ކޯޓުން އަމުރުކޮށްފިއެވެ.
އެ މައްސަލާގައި މިއަދު ބޭއްވި އަޑު އެހުމުގައި ކްރިމިނަލް ކޯޓުން އެގޮތަށް އަމުރު ކުރީ މީގެ ކުރިން އޭނާގެ މައްްޗަށް ކޮށްފައިވާ 30 ދުވަހުގެ ބަންދުގެ މުއްދަތު ހަމަވުމުން ދައުލަތުގެ އެދުމާއެކު މައްސަލައިގެ ބާވަތުން މުޖުތަމައުއަށް ނުރައްކާވުމުގެ އިހްތިމާލު އޮތް ކަމަށް ބަލައިފައެވެ.
މީގެ ކުރިން ވެސް ފުލުހަށް ހާޒިރުނުވެ، ފައިހު ފިލައިގެން އުޅެފައިވާކަން ވެސް މިއަދު މައްސަލަ ބައްލަވާ ގާޒީ ވަނީ ފާހަގަކޮށްފައެވެ.
ކްރިމިނަލް ކޯޓުގައި އެ މައްސަލާގެ އިބްތިދާއީ އަޑުއެހުންތައް ފެށުމަށް ތާވަލުކުރި ނަމަވެސް ފައިހުގެ ވަކީލުގެ އެދުމުގެ މަތިން ގާޒީ ވަނީ އެ އަޑުއެހުން ފަސްކޮށްދެއްވއިފައެވެ.
ފައިހުގެ މައްޗަށް ކޮށްފައިވަނީ ނުރައްކާތެރި ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދައުވާއެވެ.
