ރައްޔިތުންގެ މަޖިލީހުގެ ނައިބު ރައީސްގެ މަގާމުން، ގަލޮޅު އުތުރު ދާއިރާގެ މެމްބަރު، އީވާ ވަކި ކުރުން ވެގެންދާނީ، ރައީީސް އިބްރާހީމް މުހައްމަދު ސޯލިހު ސިޔާސީ ގޮތުން އަޅާނެ އެންމެ ޅަ އެއްޗަށް ކަމަށް ކުރީގެ ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު ވިދާޅުވެއްޖެއެވެ.

Ads by Asuru

އޭނާ މިފަދައިން ވިދާޅުވެފައިވަނީ، މިއަދު ކުރެއްވި ޓްވީޓެއްގައެވެ. ރައީސް ސޯލިހާ އާއިލީ ގުޅުން އޮންނަ، އީވާ ވަކި ކުރެއްވުމަކީ 2023 ވެސް ގެއްލިދާނެ ކަމެއް ކަމަށް މަލީހު ވިދާޅުވިއެވެ.

”ދާއިމަށް އާއިލާ ތެރެއިން ދުޝްމަނުން ތިޔަ އުފަން ކުރެވެނީ. ތިޔަ ގެއްލުވާލަނީ 2023 އެކަންޏެއް ނޫން.“

މަޖިލީހުގެ ނައިބު ރައީސްގެ މަގާމުން އީވާ ވަކި ކުރަން 50 މެމްބަރުންގެ ސޮޔާއެކު ވަނީ ހުށަހަޅާފައެވެ.

އީވާ ވަކި ކުރަން އެމްޑީޕީން ނިންމީ އެ ޕާޓީން ވަކިވުމަށް ފަހު ”ދަ ޑިމޮކްރެޓްސް“ ގެ ނަމުގައި އާ ސިޔާސީ ޕާޓީއެއް އުފައްދަން މަސައްކަތް ފެއްޓެވުމާ ގުޅިގެންނެވެ.

ރައްޔިތުންގެ މަޖިލީހުގެ ގަވާއިދުގައިވާ ގޮތުން މަޖިލިހުގެ ރައީސާއި ނައިބު ރައީސް މަގާމުން ވަކި ކުރެވޭނީ ޖަލްސާ އަށް ހާޒިރުވެ، ވޯޓުގައި ބައިވެރިވާ މެމްބަރުންގެ އަޣުލަބިއްޔަތުން ފާސްކުރުމުންނެވެ. މަޖިލީހުގެ މެމްބަރުންގެ އަދަދަކީ 87 ކަމަށް ވާއިރު، ހުރިހާ މެމްބަރުން ހާޒިރުވެ ވޯޓުގައި ބައިވެރިވެއްޖެ ނަމަ އީވާ މަގާމުން ދުރުކުރަން 44 ވޯޓު ބޭނުންވާނެއެވެ.