ރައްޔިތުންގެ މަޖިލީހުގެ ނިލަންދޫ ދާއިރާގެ މެންބަރު ޢަބްދުލްމުޙްސިން ޙަމީދު، ވެރިކަންކުރާ މައި ޕާޓީ އެމްޑީޕީއާއި ގުޅިވަޑައިގެންފިއެވެ.
މެންބަރު ޢަބްދުލްމުޙްސިން މިހައިތަނަށް ހުންނެވީ އެއްވެސް ސިޔާސީ ޕާޓީއަކަށް ނިސްބަތްވެވަޑައިނުގަންނަވާ، މިނިވަން މެމްބަރެއްގެ ގޮތުގައެވެ.
އޭނާ އެމްޑީޕީއާ ގުޅިވަޑައިގަތީ ރައީސް އިބްރާހީމް މުޙައްމަދު ޞާލިޙު މިހާރު ފ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ.
މިގޮތުން ރައީސް، ނިލަންދޫ ކައުންސިލާއި ބައްދަލުކުރެއްވުމަށް ބޭއްވެވި ބައްދަލުކުރެއްވުމަށްފަހު ޢަބްދުލްމުޙްސިން އެމްޑީޕީއާ ގުޅިވަޑައިގެން ސޮއިކުރެއްވި ފޯމް ވަނީ ރައީސް ޞާލިޙާ ޙަވާލު ކުރައްވައިފައެވެ.
ރައީސް މުޙައްމަދު ނަޝީދުގެ ”ފިކުރެއްގެ ދިރުން“ ފެކްޝަނުގެ 12 މެމްބަރުން އެމްޑީޕީން ވަކިވެވަޑައިގަތުމުން، އެ ޕާޓީއަށް މަޖިލީހުގެ ސުޕަރ މެޖޯރިޓީ ގެއްލުނެވެ. ޢަބްދުލްމުޙްސިން އެމްޑީޕީއާ ގުޅިވަޑައިގަތުމުން، އެ ޕާޓީގެ މެމްބަރުންގެ އަދަދު ވަނީ 56އަށް އިތުރު ވެފައެވެ.
