ރާއްޖޭގެ ސިފައިން ސިޔާސީ ނުވާން ޑިފެންސް މިނިސްޓަރު މާރިޔާ އަހުމަދުދީދީ އެދިވަޑައިގެންފިއެވެ.
މިނިސްޓަރު މިކަމަށް އެދިވަޑައިގަތީ، ރޭ ބޭއްވި ސިފައިންގެ 131 ވަނަ އަހަރީ ދުވަހުގެ ޖަލްސާގައެވެ.
މާރިޔާ ވިދާޅުވީ ސިފައިން ސިޔާސީ ކަންކަމުގެ ތެރެއަށް ވެއްދުމަށް ސިޔާސީ ބައެއް ފަރާތްތަކުން މަސައްކަތް ކުރިޔަސް، އެ ކަމުގެ ތެރެއަށް ސިފައިން ނުވަމުނަށް އެދިވަޑައިގަންނަވާ ކަމަށެވެ.
”އަޅުގަނޑަކީ ސިޔާސީ މީހަކަށް ވާއިރު، އަޅުގަނޑު ގަބޫލުކުރާ ގޮތުގައި ރާއްޖެއަށް ބޭނުންވާ ހަމަޖެހުމާއި ސުލްހަ މަސަލަސްކަން ދެމެހެއްޓޭނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ދެ ވަނަ ދައުރެއް ލިބިވަޑައިގަންނަވަނައިގެން،“ މާރިޔާ ވިދާޅުވިއެވެ.
މިނިސްޓަރު ވިދާޅުވީ، ސިފައިންނަކީ ސިޔާސީ ހަރަކާތްތަކުގައި ބައިވެރިވުން ގާނޫނުން މަނާކުރެވިފައިވާ ބައެއް ކަމަށެވެ.
މާރިޔާ ވިދާޅުވީ ގިނަ ޕާޓީތައް ހަރަކާތްތެރިވާ ޑިމޮކްރަސީގައި، އެ އިރަކު ރައީސަކަށް ހުންނަވާ ބޭފުޅަކު ހިތްހަމަޖެހިވަޑައިނުގަންނަވާ އިރަށް ޑިއު ޕްރޮސެސް އަކަށް ބެލުމެއް ނެތި ސިފައިން ވަޒީފާއިން ވަކިކޮށް، އަދަބުތައް ދިނުމަކީ ރައްޔިތުންގެ ފުރާނަ ސަލާމަތްކޮށްދިނުމަށް ހުވާ ކޮށްގެން ތިބޭ ބަޔަކަށް ވެވޭ ބޮޑު ބޭ އިންސާފެއް ކަމަށެވެ.
