ކްރިމިނަލް ކޯޓުގައި އިދިކޮޅު ލީޑަރު، ރައީސް ޔާމީންގެ ޝަރީއަތްތައް ފުލުފުލުގައި ތާވަލު ކުރަނީ ރައީސް އިބްރާހީމް މުހައްމަދު ސޯލިހު އަންގަވައިގެން ކަމަށް ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.
ޕީއެންސީގެ ނައިބު ރައީީސްކަންވެސް ކުރައްވާ ސައީދު މިފަދައިން ވިދާޅުވެފައިވަނީ، ރޭ ޕީޕީއެމް-ޕީއެންސީން ބޭއްވި ޖަގަހަ ޖަލްސާގައި ވާހަކަ ދައްކަވަމުންނެވެ.
ވ.އާރަށް ކުއްޔަށް ދޫކުރުމުގެ މުއާމަލާތާ ގުޅޭ މައްސަލައިގައި ރައީސް ޔާމީނަށް 11 އަހަރުގެ ޖަލު ހުކުމެއް އިއްވައިފައިވާއިރު، އެ ހުކުމްގެ އިސްތިއުނާފު އަޑުއެހުންތައް ހައިކޯޓުގައި ވަނީ ފަށައިފައެވެ. އަދި ރ.ފުއްގިރި މައްސަލައިގެ އަޑުއެހުންތައް، ކްރިމިނަލް ކޯޓުގައި ވަނީ ފުލުފުލުގައި ތާވަލު ކޮށްފައެވެ.
”ރައީސް އިބްރާހީމްގެ އެންގުމަށް، ސީދާ އެންގުމަށް، ރައީީސް ޔާމީން ހައި ކޯޓުން ސަލާމަތްވެވަޑައިގަންނަވާތީ، އެމަނިކުފާނުގެ މައުސޫމް ކަމާއެކު ސަލާމަތްވެވަޑައިގަންނަވާނެތީ، ދަށު ކޯޓުގައި މިއޮށް އަތުރައިލީ، ތަރުތީބުކޮށް ކޮންމެ ދުވަހެއްގައި އަޑުއެހުން އޮންނަ ގޮތަށް.“ ސައީދު ވިދާޅުވިއެވެ.
ސައީދު މިހެން ވިދާޅުވީއިރު، ފުއްގިރި މައްސަލައިގެ އަޑުއެހުންތައް ޖުލައި މަހުގެ 2، 4، 6، 9، 11 އަދި 13 ވަނަ ދުވަހު ވެސް، ކްރިމިނަލް ކޯޓުގައި އޮންނާނެއެވެ.
ސައީދު ވިދާޅުވީ، ކާމިޔާބު ވެރިކަމެއް ކުރެއްވުމަށް ފަހުގައި، ރައީީސް ޔާމީން ފަދައިން، ސަރުކާރުގެ އަނިޔާއަށް ކެތްކުރެއްވި ވެރިޔަކު، ފަހުގެ ތާރީޚު ދެކެފައި ނުވާ ކަމަށެވެ.
މިހިރީ ޢަދުލު އިންސާފުގެ ތެރެއަށްވެސް ރީނދޫ ވެރިކަން ވަދެފައިވާ މިންވަރު. ޔާރައްބު އަޅަމެންގެ ވެރި ރަސްކަލާކޮ، އަނިޔާވެރި ޞޯލިހާއި އޭނާގެ ވާގިވެރިންގެ ކިބައިން މިގައުމާ ރައްޔިތުން ސަލާމަތްކޮށްދެއްވަވާފާނދޭވެ. އަދި ދެން އިތުރަށް އަޅަމެންގެ މައްޗަށް އެ ނުބައިމީހާ ވެރި ނުކުރައްވާނދޭވެ. އާމީން.