ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލޭގެ ރަށްވެހީންނަށް ގޯތި ދިނުމަށް ހިންގާ ”ބިންވެރިޔާ“ ސްކީމްގެ ދަށުން ގޯތި ލިބޭ މީހުންގެ ވަގުތީ ލިސްޓް މިއަދު ނެރެފިއެވެ.
ޕްލޭނިން މިނިސްޓްރީން ބުނީ ވަގުތީ ލިސްޓްގައި ޝަރުތު ހަމަވެ ގޯތި ލިބޭ ފަރާތްތަކާއި އަދި ޝަރުތު ހަމަވެ ގޯތި ނުލިބޭ ފަރާތްތަކާއި ޝަރުތު ހަމަނުވާ ފަރާތްތައް ހާމަކޮށްފައިވާނެ ކަމަށެވެ.
އޭގެތެރެއިން ޝަރުތު ހަމަވެ ގޯތި ނުލިބޭ ފަރާތްތަކަށް ބިންވެރިޔާ ސްކީމުގެދަށުން މާލެ ސަރަޙައްދުން ބަންޑާރަގޯތި ދޫކުރުމުގެ އުޞޫލުގައި ބަޔާންކޮށްފައިވާ ގޮތުގެ މަތިން ޖޮއިންޓް ވުމުގެ ފުރުޞަތު ހުޅުވާލައި އިތުރު ގޯތި ދޫކުރުމަށް ހަމަޖެހިފައިވާ ކަމަށް މިނިސްޓްރީން ބުނެއެވެ.
ވަގުތީ ލިސްޓާއި ގުޅިގެން ޝަކުވާ ހުށަހެޅުމަށް ބޭނުންވާ ފަރާތްތަކުން ”ގެދޮރުވެރިން ޕޯޓަލް“ މެދުވެރިކޮށް ޝަކުވާ ހުށަހެޅުމުގެ ފުރުސަތު އަންނަ މަހުގެ 15 ގެ ނިޔަލަށް އޮންނާނެއެވެ.
ޕްލޭނިން މިނިސްޓަރު މުހައްމަދު އަސްލަމް ވިދާޅުވީ މި ޕްރޮގްރާމަށް 15،164 ފޯމް ހުށަހެޅި ކަމަށެވެ. އޭގެތެރޭގައި ޖޮއިންޓް އެޕްލިކޭޝަންތަކާއިއެކު 23،088 މީހަކު ފޯމު ހުށަހެޅި ކަމަށް އަސްލަމް ވިދާޅުވި އެވެ. އޭގެ ތެރެއިން ޝަރުތު ހަމަވީ 12،794 ފޯމް ކަމަށާއި އޭގެ ތެރޭގައި ހިމެނެނީ 19،857 މީހުން ކަމަށް އަސްލަމް ވިދާޅުވިއެވެ.
މިއަދު ގެޒެޓްކޮށްފައިވަނީ އޭގެ ތެރެއިން 10،314 މީހަކަށް ލިބޭ ގޯއްޗެވެ.
މާލެ ސަރަހައްދުން ފްލެޓް ދޫކުރުމަށް ކުރިއަށްގެންދާ ”ގެދޮރުވެރިޔާ“ ސްކީމްގެ ދަށުން ފްލެޓް ލިބޭ މީހުންގެ ލިސްޓް ވެސް ވަރަށް އަވަހަށް އާންމު ކުރާނެ ކަމަށް އަސްލަމް ވިދާޅުވިއެވެ.
