ސަރުކާރުން ދިން ކަމަށް ބުނާ ގޯތި، އެ ދުވަހުވެސް އަދި މިހާރުވެސް ވުޖޫދުގައި ނެތް ކަމަށް ފޮރިން މިނިސްޓަރު ދުންޔާ މައުމޫން ވިދާޅުވެއްޖެއެވެ.

Ads by Asuru

ދުންޔާ މިފަދައިން ވިދާޅުވެފައި ވަނީ ”ބިންވެރިޔާ“ ސްކީމްގެ ދަށުން، ގޯތި ލިބުނު މީހުންގެ ލިސްޓު އިއްޔެ ސަރުކާރުން އާއްމު ކުރުމާ ގުޅިގެން، މިއަދު ކުރައްވައިފައިވާ ޓްވީޓެއްގައެވެ.

އޭނާ ވިދާޅުވީ، އިއްޔެ ގޯތި ދިން ގޮތަށް، ކުރިންވެސް ދެވުނީސް ކަމަށެވެ.

‏ބިންވެރިޔާ ވައުދު ނުފުއްދި އޮތްކަން އެނގުނީ ހަމަ ދެންމެ.
މިއަދު ތި ގޯތި ދޭ ގޮތަށް 2018 ޑިސެމްބަރު 1 ގައިވެސް ގޯތި ދެވުނީސް. ތިބުނާ ގޯތިތަކެއް އެދުވަހުވެސް އަދި މިއަދުވެސް ވުޖޫދަކުނެތް. އިލެކްޝަނަށް ދޮޅުމަހަށް ވީމާ ގޯތިދޭނެ މީހުންގެނަން އިއުލާނު ކުރުމަކީ ރިޝްވަތު ހުށަހެޅުން.!

އިއްޔެ ހަވީރު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޕްލޭނިން މިނިސްޓަރު މުހައްމަދު އަސްލަމް ވަނީ، ”ބިންވެރިޔާ ސްކީމް“ ކުރިޔަށް ގެންދިޔަ ގޮތުގެ މައުލޫމާތު ނޫސްވެރިންނާއި ޙިއްޞާކުރައްވާފައެވެ.

ނޫސްވެރިންގެ މިބައްދަލުވުމުގައި ”ބިންވެރިޔާ“ ސްކީމްގެ ދަށުން ގޯތި ދިނުމުގެ މަސައްކަތްތައް ކުރެވިފައިވާ ގޮތް ގެދޮރުވެރިންގެ ކޮމިޓީން ވަނީ ހިއްސާ ކުރައްވާފައެވެ.

ބިންވެރިޔާ ސްކީމްގެ ދަށުން ގޯއްޗަށް ހުށައެޅި ފަރާތްތަކުގެ ތެރެއިން، 19858 މީހުން ހުށައެޅި، 12794 ފޯމު ވަނީ ޝަރުތު ހަމަވެފައެވެ. އަދި ޝަރުތު ހަމަވެފައިވާ ފަރާތްތަކުގެ ތެރެއިން ވަކިން ފޯމްހުށައަޅައިފައިވާ ފަރާތްތަކަށް ޖޮއިންޓްވުމުގެ ފުރުސަތު ދިނުމަށްވެސް ވަނީ ނިންމާފައެވެ.

ބިންވެރިޔާ ސްކީމްގެ ދަށުން މިއަދު އިޢުލާނުކުރި ލިސްޓްގައި ގޯތި ލިބޭ މީހުންގެ ތެރޭގައި 10314 މީހުން ހިމެނިފައިވެއެވެ. އަދި ލިސްޓަށް ޝަކުވާ ހުށައެޅުމުގެ ފުރުޞަތު ޖުލައިމަހުގެ 15ވަނަ ދުވަހާއި ހަމައަށް ވަނީ ހުޅުވާލާފައެވެ.