ބިންވެރިޔާ ސްކީމްގެ ދަށުން ގޯތި ދޫކުރި މީހުންގެ ލިސްޓުގައި އިންޑިއާގެ ބައެއް މީހުންގެ ނަންތައް ހިމެނިފައިފާއިރު ކުރިޔަށް އޮތް ރިޔާސީ އިންތިހާބަށް އައިޑީކާޑުން ވައްކަން ކުރުމުގެ ފުރުސަތު އެބައޮތްކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު، އަދި ޕީއެންސީގެ ނައިބު ރައީީސް އާދަމް ޝަރީފް އުމަރު ވިދާޅުވެއްޖެއެވެ.
ގޯތި ދޫކުރުމުގައި ބެލި ޝަރުތަކީ މާލޭގެ ރަށްވެއްސަކަށްވުމާއި އެކު، މައިންބަފައިންގެ ތަރިކަ މުދަލުން ލިބިފައިވާ ބައެއް ނުވަތަ ލިބެން އޮތް ބައެއް ދޫކޮށްލަން އެއްބަސްވުމެވެ.
ލިސްޓު ގެޒެޓުގައި ޝާއިއު ކުރުމާއި އެކު މި ދެ ދުވަހެއްގެ ތެރޭގައި ގިނަ މައްސަލަތައް ފެންމަތިވި އެވެ. އޭގެ ތެރޭގައި ރާއްޖޭގެ ރަށްވެހިން ހޯދާފައިވާ އިންޑިއާ ބައެއްގެ ނަން ލިސްޓުގައި އޮތްކަން ފާހަގަކުރެވެއެވެ.
މި މައްސަލައިގައި އާދަމް ޝަރީފް ވިދާޅުވީ، ސަރުކާރުން ގޯތީގެ ކަންކަމުގައި މި މޭރުމުން އަމަލު ކުރުމުން އައިޑީކާޑުތައް ވެސް ދޫކޮށްފާނެކަމުގެ ބިރު އެބައޮތް ކަމަށެވެ.
އޭނާ ވިދާޅުވީ އިންތިހާބަށް ނުފޫޒު ފޯރުވުމުގެ ގޮތުން އިންޑިއާގެ ބައެއް މީހުންނަށް ދިވެހި އައިޑީކާޑު ހަދައިދޭން އުޅޭކަމުގެ އަޑުތައް މީގެ ކުރިން ވެސް ފެތުރުނު ކަމަށެވެ. އަދި އެފަދަ ބައެއް މަސައްކަތްތައް މިހާރު ވެސް ކުރިޔަށްދާކަމުގެ ތުހުމަތުތައް ކުރެވޭކަން ފާހަގަ ކުރެއްވިއެވެ.
ރިޔާސީ އިންތިހާބަށް ވަރަށް ބޮޑަށް ފާރުވެރި ވާންޖެހޭކަމަށް ވެސް އާދަމް ޝަރީފް ވިދާޅުވިއެވެ.
