”ބޯހިވާހިކަން އެންމެންނަށް“ ސިޔާސަތުގެ ދަށުން ދޫކުރާ ފްލެޓާއި ގޯއްޗަށް އެދި ހުށަހަޅާ ޕޯޓަލް އަންނަ ހަފުތާގެ އާދިއްތަ ދުވަހު ހެނދުނު ހުޅުވައިލަން ނިންމައިފިއެވެ.
ހައުސިން މިނިސްޓްރީން މިއަދު ނެރުނު ނޫސް ބަޔާނެއްގައި ބުނީ މާލެ ސަރަހައްދުން ދޫކުރާ ބިމާއި ފްލެޓަށް އެދި ވަރަށް ގިނަ ފަރާތްތަކުން އެޕްލައި ކުރާނެ ކަމަށް ލަފާކުރެވޭތީ އާއި ހަފުތާ ބަންދާ ދިމާކޮށް ހުޅުވުމުން ރައްޔިތުންނަށް ދޭން ބޭނުންވާ މައުލޫމާތު ދިނުމުގައި ދިމާވެދާނެ ދަތިތަކެއް ހުރެދާނެތީ، އަންނަ ހަފުތާގެ އާދީއްތަ ދުވަހު ޕޯޓަލް ރަސްމީކޮށް ހުޅުވާލަން ނިންމާފައިވާ ކަމަށެވެ.
ހައުސިން މިނިސްޓްރީން ވަނީ، ރަސްމާލެއިން ދޫކުރަން ނިންމާފައިވާ ޖުމްލަ 15000 ގޯއްޗަށް ކުރިމަތިލުމަށް ހުޅުވާލައި އެ ގޯތިތައް ބެހިފަވާ ކެޓަގަރީތައް އިއުލާނުކޮށްފައެވެ.
އެގޮތުން އެ އުސޫލުގެ ދަށުން ދޫކުރުމަށް ހަމަޖެހިފަވަނީ 1250 އަކަފޫޓުގެ ގޯތިތަކެވެ.
އުސޫލުގައިވާ ގޮތުން އެ ގޯތިތަކުގެ ތެރެއިން 7000 ގޯތި ދޭނީ އުފަންވީއްސުރެ މާލޭ ގެއެއްގެ ރަށްވެހީންގެ ރަޖިސްޓަރީގައި ރަޖިސްޓަރީ ވެފައިވާ ފަރާތްތަކަށެވެ.
މާލޭ ރަށްވެހިންގެ ދަފްތަރުގައި ރަޖިސްޓަރީވެފައިވާ ފަރާތްތަކަށް 1000 ގޯތި ދޫކުރަން ހަމަޖައްސާފައިވާ ކަމަށް އުސޫލުގައިވެއެވެ.
މީގެ އިތުރުން ފަހުން މާލޭ ގެއެއްގެ ރަށްވެހީންގެ ރަޖިސްޓަރީގައި ރަޖިސްޓަރީ ވެފައިވާ ފަރާތްތަކަށްވެސް 2000 ގޯތި ހިމަނާފައިވެއެވެ.
އުސޫލުގައި މާލޭގައި ދިރިއުޅޭ އެހެން ރަށްރަށުގެ ރަށްވެހީންނަށްވެސް 3000 ގޯތި ހިމަނާފައިވެއެވެ. އެ ގޯތިތަކަށް ޝަރުތު ހަމަވާނީ މާލޭގައި ދިރިއުޅޭތާ 15 އަހަރުވެފައިވާ ނަމައެވެ.
