ބައެއް ހާލަތްތަކުގައި ދެމަފިރިން އެކުގައި ދިރިއުޅެނީ ދަރީންނަށްޓަކައެވެ. މައްސަލަތައް ފުނި ޖެހި، ވަރިވާން ބޭނުންވިޔަސް ނުވެ ތިބެނީ ދަރިން ބިކަވެދާނެތީއެވެ. އަދި ބައެއް ފަހަރު ވަރިވުން ނޫން ހައްލެއް ނެތް ކަމަށް ގަބޫލުު ކުރެވި، ކައިވެނި ރޫޅާލަންވެސް ޖެހެއެވެ.
ކައިވެންޏެއް ރޫޅުމުން، ދެމަފިރިންނަށް ކުރާ އަސަރާއެކުގައި، އެ ދެމީހުންގެ ދަރިންނަށްވެސް ވަރަށް ބޮޑަށް ނޭދެވޭ އަސަރު ކުރެއެވެ.
ދިރާސާތަކުން ދައްކާ ގޮތުގައި މަންމަ އާއި ބައްޕަ ވަކިވުމަށްފަހުގައި، ދަރިންނަށް އެންމެ ބޮޑަށް އަސަރު ކުރަނީ ވަރިއަށް ފަހު، ފުރަތަމަ ދެ އަހަރު ދުވަހުއެވެ. އެގޮތުން މަންމަ އާއި ބައްޕަ ވަކިން އުޅެން ފެށުމުން، ދަރިންނަށް ދެގެއަށް ދާން ޖެހޭ ސަބަބާއި، މަންމަ އާއި ބައްޕަ އާއެކުގައި ވަގުތުތައް ހޭދަ ނުކުރެވުމަކީ ދަރިން އެކަމާ ހިތާމަ ކުރާނެ ކަންކަމެވެ.
މަންމަ އާއި ބައްޕަ ވަކިވީ އެކުދިންގެ ސަބަބުން ކަމަށްވެސް ބައެއް ކުދިންނަށް ހީކުރެވިދާނެއެވެ. މިހެން ދިމާވެއްޖެނަމަ، ނަފްސާނީ ގޮތުން ކުދިން ބަލިކަށިވެއެވެ. އަދި މިކަމުގެ ނަތީޖާ އަކަށް ބައެއް ފަހަރު ވަނީ، ކުދިންގެ ތައުލީމަށް އަަސަރުކޮށް، ކުރިން ފާސް ވަމުން އައި މާއްދާތަކުންވެސް ފެއިލްވުމެވެ. ދަށް ގްރޭޑްތައް ލިބެން ފެށުމެވެ.
ފުރާވަރު އުމުރުގެ ކުދިން ވަރިއާ ޑީލް ކުރާ ގޮތް އަދި ތަފާތުވެއެވެ. އެކުދިންގެ ހިތްތަކުގައި، ވަރީގެ ސަބަބުން، ކޮންމެވެސް އެއް ބެލެނިވެރިއަކަށްޓަކައި ހިތުގައި ނަފްރަތުވެސް އުފެދިދާނެއެވެ. އެއީ ވަރީގެ ކުރިން، ކުދިންނަށް ގޭތެރެއިން ފެނުނު މަންޒަރުތަކުގެ ސަބަބުން، މަންމަ ނޫނީ ބައްޕައަށް ބްލޭމް ކުރެވޭ ގޮތް މެދުވެރިވެގެންނެވެ.
މި މައްސަލަތަކަށް ހައްލު ހޯދުމަށްޓަކައި ވަރިއަށް ފަހުގައިވެސް ދެމީހުން ދަރިންގެ ކަންކަމަށް ސަމާލުކަން ދިނުން މުހިންމެވެ. އެގޮތުން މަންމަ އާއި ބައްޕަ ވަކިވިޔަސް، ދަރިން ދެކެވާ ލޯތްބަށް އެއްވެސް އުނިކަމެއް ނާންނާނެކަން ބުނެދިނުންވެސް މުހިންމެވެ.
