ސިޔާސީ ކުލައަކަށާއި، މަގާމަށް ބެލުމެއް ނެތި، އިސްލާމްދީންގައި މަނާ ކޮށްފައިވާ އެއްްޖިންސުން ގުޅުން ހިންގުން ފަދަ ފާހިޝް އަމަލުތަކަށް އަރައިގަންނަ މީހުންނަށް އަދަބު ދޭން ގޮވާލައި، ރައްޔިތުންގެ މަޖިލީހަށް ކުއްލި މައްސަލަ ހުށަހަޅަން ފުރުސަތު ނުދީ ބޭރު ކޮށްލައިފިއެވެ.

Ads by Asuru

މަޖިލީހަށް މި މައްސަލަ ހުށަހެޅުއްވީ، ނޮޅިވަރަމް ދާއިރާގެ މެމްބަރު މުހައްމަދު ނަޝީދު(މޮސްޓާ)އެވެ. އޭނާ މިފަދަ މައްސަލައެއް ހުށަހެޅުއްވިއިރު، އެމްޑީޕީގެ އިސް ފަރާތްތަކެއްގެ ބަދު އަހުލާގީ އަމަލުތަކެއް ފެންނަ ފޮޓޯއާއި ވީޑިއޯތައް ދަނީ ލީކުވަމުންނެވެ.

މިއަދުގެ ޖަލްސާ ފައްޓަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ ދައުރުވަމުންދާ ފޮޓޯތަކަކީ ތުހުމަތެއް ކަމަށާއި އެހެންކަމުން ބައެއްގެ މައްޗަށް ކުރެވޭ ތުހުމަތެއްގެ މައްޗަށް މަޖިލީހުގައި ވާހަކަދައްކަން ފުރުސަތު ދޭން ޖެހޭނެ ކަމަށް ގަބޫލު ނުކުރެވޭ ކަމަށެވެ.

ރައީސް ނަޝީދު މި މައްސަލަ ބަލައިގަތުމަށް ދެކޮޅު ހެއްދެވުމުން މަޖިލީހުގައި އިދިކޮޅު މެމްބަރުން ވަނީ، ނަޝީދު މަޖިލިސް ކުރިއަށް ގެންދަވަނީ ގާނޫނާ ހިލާފަށް ކަަމަށް ތުހުމަތު ކުރައްވައިފައެވެ.

މޮސްޓާ ހުށަހަޅުއްވަން އުޅުއްވި މައްސަލައިގައި ވަނީ ރަސޫލާ(ސ.އ.ވ)އަށް ފުރައްސާރަ ކުރުމާއި، އެއްޖިންސުން ގުޅުން ހިންގުން ފަަދަ އަމަލުތައް އިތުރުވަމުން އަންނައިރުވެސް، މިކަންކަން ހުއްޓުވުމަށް އެއްވެސް ފިޔަވަޅެއް ނާޅާކަން ފާހަގަކުރައްވައިފައެވެ.

އަދި ދައުލަތުން ހިއްސާވާ ކުންފުނިތަކުގެ ބޯޓުފަހަރުގައި މަސްތުވާތަކެތި ރާއްޖެއަށް އެތެރެ ކުރި ދެ މައްސަލައެއް ފެންމަތިވެ، މަސްތުވާތަކެތި އެތެރެ ކުރުމުގައި ދައުލަތުން ބައިވެރިވަމުން އަންނަ ކަމަށް ތުހުމަތު ކުރެވޭކަން ފާހަގަކުރައްވައި، ރާއްޖޭގައި މަސާޖު ކުރުމުގެ ނަމުގައި ފާހިޝް އަމަލުތައް ހިންގާ ތަންތަން ގިނަވަމުންދާކަން އާއްމުން ފާހަގަކުރަމުން އަންނަ ކަމަށްވެސް މައްސަލައިގައި ބުނެފައިވެއެވެ.

އަދި މިފަދަ މައްސަަލަތައް ތަހުގީގުކޮށް، ޖިނާއީ ދައުވާކޮށް، ގާނޫނުލްއުގޫބާތާއި، އެނޫންވެސް ގާނޫނުތަކާއި، އިސްލާމީ ޝަރީއަތް ތަންފީޒު ކުރުމުގައި ރާއްޖޭގެ އިދާރާތައް ފެއިލްވެ ނުކުޅެދިފައިވާއިރު، މިފަދަ ނުބައި އަމަލުތަކަކީ އާދައިގެ ކަންކަން ކަމުގައި ހެދުމަށް މަސައްކަތް ކުރާ ކަަމަށް ތުހުމަތު ކުރެވޭ ކަމަށްވެސް އެ މައްސަލައިގައި ވެއެވެ.

ކުއްލި މައްސަލަ ބަލަައިނުގަތުމުން، ޓްވިޓަރގައި މޮސްޓާ ވަނީ، މައްސަލަ ބަލައިނުގަތީ، މިފަދަ ކަންކަމަކީ ނަޝީދުގެ އާއިލީ ކުޅިވަރަކަށް ވީމަތޯ ސުވާލު ކުރައްވައިފައެވެ.